पोखरा । शिक्षा, विज्ञान तथा प्रविविध मन्त्री विद्या भट्टराईले शिक्षा र स्वास्थ्य बीचको तादात्म्यताले मात्रै समृद्ध समाजको निर्माण गर्न सकिने बताएकी छन् ।
राष्ट्रिय योग दिवसको अवसरमा काठमाडौँमा आयोजित कार्यक्रमलाई सम्बोधन गर्दै उनले यस्तो बताएकी हुन् ।
उनले शिक्षासँग योगसँग नजोडिकन समाजलाई समृद्ध बनाउन नसकिने बताइन् । उनले योगलाई कक्षा कोठा र विद्यार्थीको जीवनसँग जोड्न बाँकी रहेको र अब आगामी शैक्षिक सत्रदेखि योगलाई विद्यार्थीको जीवनसँग जोड्ने प्रतिवद्धता जनाइन् ।
शिक्षा र स्वास्थ्य आजको महत्वपूर्ण विषय भएको उल्लेख गर्दै उनले शिक्षा र स्वास्थ्य राज्यका लागि पनि सुदृढ गर्नुपर्ने विषय रहेको बताइन् ।
मन्त्री भट्टराईले योगलाई जीवनमा ग्रहण गर्नुपर्ने आवश्यकता औंल्याइन् ।
मन्त्री भट्टराईले भनिन्, ‘योगलाई कक्षा कोठा र विद्यार्थीको जीवनसँग जोड्न बाँकी छ, अब हामी संकल्प गरौँ, योगलाई विद्यार्थीको जीवनसँग जोडौँ, हरेक विद्यालयको अभ्याससँग जोडौँ, हाम्रा विद्यार्थीका क्रियाकलापसँग जोडौँ, जसले गर्दा हामीले संस्थागत विद्यालय अर्थात समृद्ध भएका विद्यालय मात्र होइन, सार्वजनिक विद्यालयमा पढ्ने विपन्न विद्यार्थी, जसको मनोविज्ञान र मनोबललाई बढाउन पनि योग र ध्यानले प्रश्रय गरोस् ।’
उनले थपिन्, ‘त्यसका लागि अब आउने सेसनबाट हाम्रा अभ्यास शुरु गर्नुपर्छ, त्यस काममा लाग्नुपर्छ, त्यसप्रति प्रतिवद्ध भएर शिक्षा, विज्ञान तथा प्रविधि मन्त्रालय लाग्नेछ, शिक्षा र स्वास्थ्य आजको महत्वपूर्ण विषय हो, यो राज्यका लागि पनि सुदृढ गर्नुपर्ने विषय छ, शिक्षा र स्वास्थ्यबीचको तादात्म्यताले मात्रै हामीले समृद्ध समाजको निर्माण गर्नसक्छौँ, शिक्षासँग योग नजोडिकन हामीले समाजलाई समृद्ध बनाउन सक्दैनौँ ।’
मन्त्री भट्टराईले शिक्षा र स्वास्थ्यलाई प्राथमिकता दिएर अघि बढ्न सके मात्रै मुलुकलाई समृद्धितर्फ अघि बढाउन सकिने उल्लेख गरिन् ।
उनले शिक्षाको माध्यमबाट नै विगतमा समाजलाई जागरुक गरेको भएपनि अब आम नागरिकमा जागरुकता ल्याउन योग र ध्यानको आवश्यक रहेको बताइन् ।
