पोखरा । नेपाली कांग्रेसका नेता एवं तरुण दलका केन्द्रीय सदस्य मदन बस्नेतले आफूले पोखरा-३२ जनप्रतिनिधिमाथि सांघातिक आक्रमण नगरेको बताएका छन् ।
पोखरा-३२ का वडाध्यक्ष अक्कलबहादुर कार्कीसहित सदस्यहरुले प्रेस विज्ञप्ति प्रकाशित गरी कांग्रेस नेता बस्नेतले आफूहरुमाथि सांघातिक आक्रमण गरेको आरोप लगाएका थिए ।
नीतिप्रेस डटकमसँग टेलिफोन कुरा गर्दै नेता बस्नेतले भने, ‘घटना त भएको हो, सांघातिक आक्रमण होइन, धकेलाकधेल मात्र भएको हो ।’
नागरिकताको प्रमाणपत्र सिफारिस गर्ने विषयमा विवाद बढ्दै गएपछि सो घटना भएको बताइएको छ । उनले सांघातिक आक्रमण भन्ने आरोप निराधार रहेको स्पष्ट पारे ।
यता, जिल्ला प्रहरी कार्यालय कास्कीले वडाध्यक्ष कार्कीसहित जनप्रतिनिधिको जाहेरी दर्ता भएको जानकारी दिएका छन् । नीतिप्रेस डटकमसँग कुरा गर्दै कास्की प्रहरी प्रमुख प्रहरी उपरीक्षक श्यामबाबु ओलियाले जनप्रतिनिधिले सांघातिक आक्रमण भएको भन्दै न्यायका लागि दिएको जाहेरी दर्ता भएको बताए ।
उनले प्रहरीले जाहेरी लिएन भन्ने कुरामा सत्यता नभएको बताए ।
यता, वडाध्यक्ष कार्कीले पनि कास्की प्रहरीमा भर्खरै जाहेरी दर्ता भएको जानकारी दिए ।
यस्तो छ वडाध्यक्ष कार्कीसहित वडा सदस्यहरुद्वारा जारी विज्ञप्ति
