पोखरा । गण्डकी प्रदेश प्रहरी कार्यालय पोखराका प्रहरी नायव महानिरीक्षक (डीआइजी) भोलाबहादुर रावलले जिल्ला प्रहरी कार्यालय कास्कीको निरीक्षण गरेका छन् ।
डीआइजी रावल आज कास्की प्रहरी कार्यालय पुगेर कार्यालयको काम कार्वाही, अपराध अनुसन्धान, हिरासत व्यवस्थापन, महिला, बालबालिका तथा ज्येष्ठ नागरिकप्रतिको व्यवहार तथा सामुदायिक साँझेदारीअन्तर्गतका कार्यक्रमको विषयमा जानकारी लिएका थिए ।
साथै सवारी दुर्घटना न्यूनीकरण, लागुऔषध नियन्त्रण, फरार प्रतिवादी पक्राउ, कानून कार्यान्वयनमा शून्य सहनशीलता, प्रहरी आचारण व्यवहारको सम्बन्धमा पनि उनले आवश्यक निर्देशन दिए।
डीआइजी रावललाई कास्की प्रहरी प्रमुख प्रहरी उपरीक्षक (एसपी) श्याम बाबु ओलियालगायतले स्वागत गरेका थिए ।
डीआइजी रावल हालैमात्र गण्डकी प्रदेश प्रहरी प्रमुख भएर आएका हुन् । उनले मातहतका विभिन्न कार्यालयकाे निरीक्षण गरी आवश्यक निर्देशन दिँदै आएका छन् ।
