पोखरा । पोखरा महानगरपालिका वडा नं ६ स्थित महिला सञ्जालले शनिबार तनाव एवं समय व्यवस्थापन कार्यक्रम आयोजना गर्यो । वडा कार्यालयको सहयोगमा सञ्जीवनी नारी समूहका अध्यक्ष भगवती बानिया केसीको संयोकत्वमा भएको कार्यक्रम पोखरा-६ भित्रका १८ महिला समूहका करिब चार सय ५० जना सहभागी थिए ।
कार्यक्रममा सहभागीलाई स्वामी डा. योगी विकाशानन्दले तनाव एवं समय व्यवस्थापनबारे प्रशिक्षण दिएका थिए । प्रशिक्षक स्वामी विकाशानन्दले तनाव अहिलेको युगको सबैभन्दा जटिल मानसिक समस्या भएको भन्दै वैज्ञानिक विकासको सहयोगले जुन-जुन देशमा जीवनशैली जति-जति परिवर्तन भइरहेको छ, त्यति-त्यति नै त्यहाँका मानिस बढी तनावमा बाच्न बाध्य भइरहेको स्पष्ट बताए ।
तनाव सधैँ नकारात्मक नहुने भन्दै उनले एक हदसम्मको तनावले सजगता, प्रेरणा र कार्यदक्षता दिने स्पष्ट पारे । उनले भने, ‘तनावले सीमा नाघ्नासाथ तनावले अनेक प्रकारका शारीरिक, मानसिक र भावनात्मक समस्या खडा गरिदिन्छ, हाम्रोजस्तो अविकसित देशमा पर्याप्त चुनौती र प्रतिस्पर्धा नहुनु, कार्यसम्पादनको गुणवत्ताको कुनै मापदण्ड नहुनु, निश्चित लक्ष्यसम्म पुग्न निश्चित समय सीमा निर्धारण नहुनुले पनि मानिस अल्छी, लोसे र अप्रत्युत्पादक भएको देखिएको छ ।’
आफूलाई भौतिक, मानसिक कुरामा प्रतिकुल असर पार्ने कतिपय कुराको संलग्नताप्रति दृढतापूर्ण नाइ भन्न सिक्नुपर्नेमा उनले जोड दिए । ध्यान र योगाभ्यास तनाव विसर्जनमा सर्वाधिक लाभदायक हुने उनले बताए । नियमित ध्यानले अति तनावग्रस्त परिस्थितिमा पनि शान्त र सकारात्मक रहन सक्ने समझ र धैर्यको विकास उनले हुने बताए । योग, पौडी र प्रकृतिमा टहल्नुलाई तनावबाट मुक्त हुने निरापद उपाय भएको उनले बताए ।
यसअघि कार्यक्रम उद्घाटन गर्दै पोखरा महानगरपालिकाकी उपप्रमुख मञ्जुदेवी गुरुङले वर्तमान समयमा तनाव व्यवस्थापन अपरिहार्य भएको बताइन् । सञ्जालले निकै समयसान्दर्भिक कार्यक्रम आयोजना गरेको भन्दै उनले प्रशंसा गरिन् । यस्तै रचनात्मक कार्यमा महानगरपालिकाले साथ दिने उनले प्रतिवद्धता जनाइन् ।
सञ्जाल अध्यक्ष बबिता मल्लको अध्यक्षतामा भएको कार्यक्रममा वडासदस्य पवित्रा थापाले स्वागत र सञ्चालन सचिव रेनु लामिछानेले गरेकी थिइन् ।
