पोखरा । साहित्यकार सुरज उपाध्यायको चौथो कृति कविता सञ्चयन ‘बाबा कतारमा, आमा हतारमा’ बजारमा आएको छ ।
२८ वटा कविता संग्रहित कृतिको मूल्य दुई सय ५० रुपैयाँ छ ।
कवि सुरजले बालबालिकाको मनोविज्ञान र अहिलेको परिवेशलाई कवितामा उतार्न खोजेको बताए ।
उनी भन्छन्, ‘कविता संग्रहमा बालबालिकाको मनोविज्ञानलाई सम्मान गरिएको छ, बालबालिकालाई मनोरञ्जन, ज्ञान त दिनैपर्छ, सँगसँगै अहिलेको परिवेश, समाज पनि सिकाउनुपर्छ भन्ने कुरा मनन गरी लेखिएका कविता यसमा छन् ।’
यसअघि उपाध्यायका गजल संग्रह तिम्रो मन फर्किएन गजल संग्रह (२०६०) र दुई बालकविता सञ्चयन चील उड्यो आकाशमा (२०७१) र साइकल (२०७९) प्रकाशित छन् ।
बालमनोविज्ञानलाई नयाँ बिम्ब, प्रतीकमार्फत् अभिव्यक्त गर्न सिपालु छन् कवि सुरज । उनले सत्ता परिवर्तन, विद्रोह र चेतनाका लागि लेखनमार्फत् आवाज उठाउँदै आएका छन् ।
