पोखरा । कास्की प्रहरीले स्वरुप परिवर्तन गरिएका ४७ वटा मोटरसाइकल नियन्त्रणमा लिएको छ ।
यही माघ १४ देखि २० गतेसम्म छ दिनमा स्वरुप परिवर्तन गरिएका ४७ वटा मोटरसाइकल नियन्त्रणमा लिएर आवश्यक कार्वाहीका लागि यातायात व्यवस्था कार्यालय पोखरा पठाइएको जिल्ला प्रहरी कार्यालय कास्कीले जनाएको छ ।
सूचना अधिकारी एवं प्रहरी नायव उपरीक्षक (डीएसपी) वसन्तकुमार शर्माका अनुसार जिल्ला प्रहरी कार्यालय, मातहत प्रहरी इकाई र जिल्ला ट्राफिक प्रहरी कार्यालय कास्कीको संयुक्त प्रयासमा छ दिनमै स्वरुप परिवर्तन गरिएका ४७ वटा मोटरसाइकल नियन्त्रणमा लिन सफल भएको हो ।
समाजमा चर्को आवाजमा ध्वनि प्रदुषण गर्दै हिंड्ने मोटरसाइकललाई चेकजाँच गर्ने क्रममा नियन्त्रणमा लिइएको डीएसपी शर्माले जानकारी दिए ।
स्वरुप परिवर्तन र ध्वनि प्रदुषण गरी मोटरसाइकल चलाएको देखेमा खबर गरिदिन कास्की प्रहरीले आग्रह गरेको छ ।
