पोखरा । नेपाल सरकारका गृहमन्त्री रमेश लेखकले सुदूरपश्चिमको विकासमा सबैले ध्यान दिनुपर्ने बताएका छन् ।
पोखरास्थित सुदूरपश्चिम सम्पर्क एवं विकास समाजद्वारा आयोजित भेटघाट कार्यक्रममा गृहमन्त्री लेखकले यस्तो बताएका हुन् ।
सुदूरपश्चिमको भविष्य उज्ज्वल रहेको उल्लेख गर्दै उनले विकासमा पनि पोखरामा बसोबास गर्ने सुदूरपश्चिमेलीले बल गर्नुपर्ने खाँचो औंल्याए ।
उनले विभिन्न पेशा, व्यवसाय र रोजगारीका लागि पोखरा आएर संगठित भई सामाजिक एवं दुःख सुखका गतिविधि गरेकामा समाजको प्रशंसा गरे ।
नेपाली कांग्रेसका केन्द्रीय सदस्य नैनसिंह महरले समाजका लागि गतिविधिप्रति आफू निकै खुशी भएको भन्दै समाजका लागि सहयोग आवश्यक परेमा आफू तयार रहेको स्पष्ट पारे ।
समाजका अध्यक्ष निरज पन्तले आगामी दिनमा समाजलाई सशक्त बनाउने भन्दै यसमा सबैको साथ र सहयोग आवश्यक रहेको बताए । उनले समाज स्थापनादेखि नै सुदूरपश्चिमवासीको सुख दुखमा साथ दिँदै आएको भन्दै समाजका नियमित गतिविधिलाई अघि बढाउने, समाजलाई गण्डकीमा चिनाउने कार्यमा आफू लागिपरेको बताए ।
साथै उनले केही दिन अघि समाजका आजीवन तथा साधारण सदस्यको स्वास्थ्य परीक्षण तथा उपचारमा छुट पाउने गरी मणिपाल शिक्षण अस्पताल र स्वस्तिक रिफरल ल्याबरोटरीसँग सम्झौता गरिएको जानकारी दिए ।
समाजका पूर्वअध्यक्ष एवं पोखरा विश्वविद्यालयका डीन राजेश कुमार ठकुराठीले समाजको गतिविधिमाथि प्रकाश पारेका थिए ।
कार्यक्रममा नेपाली कांग्रेस अछाम सभापति पुष्प शाह, समाजका वरिष्ठ उपाध्यक्ष जगत धामी र सचिव हरिन्द्र जोशीले पनि बोलेका थिए ।
कार्यक्रममा सुदूरपश्चिम प्रदेशका नौ वटै जिल्लाका सभापति र उपसभापति, बैतडी सभापति एवं नेपाल क्रिकेट संघका अध्यक्ष चतुरबहादुर चन्द, कास्कीका प्रमुख जिल्ला अधिकारी भरतमणि पाण्डेका साथै पोखरामा रहेका सुदूरपश्चिमेली सहभागी थिए ।
