पोखरा । सर्वेश्वर व्यवसायी समिति पोखराले सञ्चालन गरेको निःशुल्क भाग्यशाली उपहारअन्तर्गत स्कुटर पोखरा-१६ लामाचौरकी रीना बस्नेतले प्राप्त गरेकी छन् ।
पोखराको चिप्लेढुंगादेखि गैह्रापाटनसम्म फैलिएको सर्वेश्वर मार्ग र पराजुली मार्गका होलसेल व्यवसायीको छाता संस्थाका रुपमा रहेको समितिले नेपालीको महान पर्व बडादशैं, तिहार, नेपाल सम्वत् र छठ पर्वको अवसरमा तीन महिना लामो अवधि राखेर सञ्चालन गरेको निःशुल्क भाग्यशाली उपहार योजना गत माघ १९ गते शनिबार आयोजित साधारणसभामा सार्वजनिक गरिएको थियो ।
समितिमा आवद्ध व्यवसायीको पसलबाट समान खरिदमा निःशुल्क उपहार कुपन वितरण गरिएको थियो । जसमा ६० हजार भन्दा बढीले उपहार कुपन लिएको अध्यक्ष तुलबहादुर थापा (राजन)ले जानकारी दिए ।
सो लक्की ड्रबाट बिजेता बनेकी बस्नेतलाई सोमबार स्कुटर हस्तान्तरण गरिएको हो । बस्नेतलाई पोखरा महानगरपालिका वडा नं ४ का वडाध्यक्ष देवकृष्ण पराजुली, समिति अध्यक्ष थापा, सल्लाहकार तथा पूर्वअध्यक्ष धर्ममानसिंह भण्डारी, सल्लाहकार प्रेम सुवेदी, नरहरि अधिकारीलगायतले उपहार हस्तान्तरण गरेका थिए ।
कार्यक्रममा लक्की ड्रबाट द्वितीय उपहार विजेता बनेकी तनहुँ म्याग्दे गाउँपालिकाकी मेनुका पौडेललाई पनि ल्यापटप उपहार हस्तान्तरण गरिएको समितिले जनाएको छ ।
तृतीय उपहार विजेता पोखराका समीर कोइरालालाई मोवाइल, चौथो पुरस्कार विजेता पोखरा-४ गैह्रापाटनका सौगात पाण्डेले साईकल उपहार जितेका थिए । तर पाण्डेलाई मायाको चिनो मात्रै प्रदान गरियो ।
व्यवसायी वा उनीहरुको परिवारलाई उपहार परेमा उपहार बदर गर्ने नीति यसअघि नै बनेकाले सोही नीति अनुसार पाण्डेलाई साइकल उपहारको सट्टा मायाको चिनो प्रदान गरिएको हो ।
सो लक्की ड्रमा सान्त्वना उपहार बिजेता पोखरा सेदीकी सृजना कँडेल, स्याङ्जा पुतलीबजार-११ की पूजा पौडेल र गीता पुन तथा ज्योतिषा रानालाई जनही पाँच हजार रुपैयाँ हस्तान्तरण गरियो ।
सो अवसरमा वडाध्यक्ष पराजुलीले व्यापार प्रवर्द्धका लागि समितिले गरेको काम सह्रानीय भएको बताए । उनले व्यापार प्रवर्द्धनका लागि वडा कार्यालयल ेपनि सघाउने प्रतिबद्धता जनाए ।
समिति अध्यक्ष थापाले व्यापार प्रवर्द्धनका लागि निःशुल्क उपहार योजना सञ्चालन गरिएको बताए । उनले आगामी दिनमा पनि अन्य कार्यक्रम निरन्तर गर्ने बताए ।
सल्लाहकार प्रेमप्रसाद सुवेदीले निःशुल्क भाग्यशाली उपहार योजनाले व्यापार प्रवर्द्धमा सघाएको दावी गरे ।
कार्यक्रममा उपाध्यक्ष छविलाल गौतमले स्वागत र सञ्चालन महासचिव विशाल अधिकारीले गरेका थिए ।
