पोखरा । कास्कीको मादी गाउँपालिकास्थित सोंथरबेँसी (सुन्दर बेँसी) मा यही फागुन १ र २ गते सोंथरबेँसी टारी बजार मेलाको हुने भएको छ ।
मेलाको सबै तयारी पूरा भएको संयोजक तथा आयोजक सोंथर बेँसी विकास समिति प्रथम उपाध्यक्ष आशबहादुर गुरुङले जानकारी दिए ।
‘मेला सम्पन्न गर्न गठित विभिन्न उपसमितिले आआफ्नो जिम्मेवारी पूरा गरिसकेका छन्’, संयोजक गुरुङले भने, ‘सबैको सहयोगको कारण मेला सभ्य र भव्यरुपमा सम्पन्न हुने अपेक्षा गरेका छाैँ ।’
सोंथरबेँसी जाऔँ, टारी बजार मेलामा सहभागी बनौँ र त्यस आसपास क्षेत्रको कृषि पर्यटन प्रवर्द्धन गराैँ भन्ने मूल नाराका साथ मेला आयोजना गरिएको हो ।
मेलामा कृषि कार्यक्रमतर्फ गोरु जुधाई प्रतियोगिता, गोरु प्रदर्शन एवं किनबेच, साटासाट, खसी, बोका, बाख्रा, मह, घ्यू, आलु, तरकारी, माछालगायत कृषिजन्य वस्तु र पशुको प्रदर्शन एवं किनबेचसमेत हुने मेला सहसंयोजक नन्दलाल अधिकारीले जानकारी दिए ।
यस्तै, खेलकुद प्रतियोगितातर्फ खुला फाइभ ए साइड पुरुष फुटबल, खुला पुरुष छेलो फाल्ने, खुला पुरुष तथा महिला रस्सी तान्ने खेल छन् ।
यसैगरी सांस्कृतिक कार्यक्रमतर्फ ३० बर्षभन्दा माथि उमेर समूह र ३० बर्ष भन्दा कम उमेर समूहको छुट्टाछुट्टै नृत्य प्रतियोगिता, स्थानीय गाउँका आमा समूहका नाँच, युवा क्लबको ठेटार नाच, घाटु नाँच, कृष्णचरित्र नाँच, स्थानीय दोहोरी गायक गायिकाको गायन र भजन प्रस्तुति रहने मेलाका सहसंयोजक बेदबहादुर गुरुङले जानकारी दिए ।
गत बर्ष गोरु जुधाइँ प्रतियोगिताले दर्शक तथा गोरु पाल्ने किसानलाई निकै आकर्षण गराएकोले यस बर्ष पनि प्रतियोगिता विशेष रुपमा गरिने समिति सचिव डिल्लीराज गिरीले बताए ।
यस्तै शैक्षिक कार्यक्रमतर्फ कक्षा १ देखि ३ सम्मका विद्यार्थीका लागि खुला श्रुतीलेखन प्रतियोगिता, कक्षा ४ देखि ८ सम्मका विद्यार्थीका लागि ‘सोंथरबेँसीमा कृषि पर्यटन प्रवर्द्धनको सम्भावना’ शीर्षकमा वक्तृत्वकला प्रतियोगिता हुजने समिति द्वितीय उपाध्यक्ष दीर्घमान गुरुङले जानकारी दिए ।
मेला सम्पन्न गर्न विभिन्न उपसमिति गठन गरिएको प्रचारप्रसार संयोजक दीपकजंग गुरुङले जानकारी दिए । मेला सञ्चालन गर्न करिब पाँच लाख रुपैयाँ खर्च लाग्ने समिति कोषाध्यक्ष रमा क्षेत्रीको दावी छ ।
