पोखरा । पोखरा महानगरपालिकाको वडा नं. १४ र २६ जोड्ने डहरे साँघु सडकको वडा नं. १४ तर्फ निर्माण कार्यको सोमबार शुभारम्भ भएको छ ।
दुई वडालाई जोड्ने सडकको वडा नं. १४ का अध्यक्ष बोधबहादुर कार्की र पाेखरा-२६ का अध्यक्ष नरेन्द्र थापाले संयुक्त रुपमा निर्माण कार्यको शुभारम्भ गरेका हुन् ।
पोखरा-२६ का अध्यक्ष थापाले डहरेको साँघुदेखि पोखरा-२६ को क्षेत्रमा गत बर्ष सडक कालोपत्रे भए पनि पाेखरा-१४ तर्फ सडक नबन्दा यात्रुले सास्ती खेप्नु परेको बताए ।
उनले एकातर्फ राम्रो सडक देखेर आउने यात्रु पुल पारिपट्टी पुग्दा सास्ती खेप्दै फर्कनु परेकोमा सडक निर्माणले अब सहज बनाउने उल्लेख गरे ।
अध्यक्ष थापाले बुढीबजार सक्नेरी हुँदै डहरेको साँघुसम्मको सडकको बिग्रेको खण्डमा यसैबर्ष रिसोलिङ गरिने बताए ।
उनले सडकवत्ती जडान गरी रातिको समयमा समेत यात्रा गर्न मिल्ने गरी वडाले कार्य अघि बढाएको समेत स्पष्ट पारे ।
पोखरा-१४ का अध्यक्ष बोधबहादुर कार्कीले पारिपट्टी राम्रो सडक देखेर वारी आएका यात्रुले आलोचना गरेको स्मरण गर्दै धेरै पछि भए पनि राम्रो कामको शुरुवात भएको बताए ।
उनले निर्माण कम्पनीलाई समयमै सडक निर्माण सक्ने गरी कार्य गर्न आग्रह गरे ।
संघीय सरकारको ६३ लाख ४९ हजार तीन सय ६५ रुपैयाँको लागतमा उक्त सडक निर्माण हुन लागेको हो ।
सडकको एक करोड रुपैयाँमा बोलपत्र आब्हान भएकोमा कमलपोखरी निर्माण सेवा पोखरा-१३ ले उक्त रकममा ठेक्का प्राप्त गरेको हो ।
सडक वडा नं. १४ को राधाकृष्ण टोलदेखि डहरेको साँघुसम्म नालासहितको ढलान हुनेछ ।
निर्माण व्यवसायी गोविन्द विकले वैशाख मसान्तसम्म सडक सम्पन्न गरेर हस्तान्तरण गर्ने प्रतिवद्धता जनाए ।
पोखरा-२६ का वडाध्यक्ष थापाले उक्त सडक भएर आवातजावत गर्नेलाई निर्माण अवधिभर वैकल्पिक सडक प्रयोग गर्न आग्रहसमेत गरेका छन् ।
