पोखरा । उच्च शिक्षालय तथा माध्यमिक विद्यालय सङ्घ नेपाल (हिसान) का केन्द्रीय उपाध्यक्ष बाबुराम पन्तले त्रिभुवन विश्वविद्यालय जानुपर्ने विद्यार्थी त्रिभुवन अन्तर्राष्ट्रिय विमानस्थल जानुपर्ने परिपाटी अन्त्य गर्न सबै लाग्नुपर्नेमा जोड दिएका छन् ।
पोखरा महानगरपालिका वडा नं १२ भद्रकालीस्थित पोखरा युनाइटेड एकेडेमी सेकेण्डरी स्कुलको वार्षिक सांस्कृतिक भेला तथा पुरस्कार वितरण कार्यक्रममा उनले यस्तो जोड दिएका हुन् । उनले विद्यालय राम्रो बनाउन र गुणस्तरीय प्रदान गर्न सबैको सहयोग आवश्यक हुने बताए ।
विद्यालय खोल्नुमात्र ठूलो मात्र ठूलो कुरा नभएको भन्दै उपाध्यक्ष पन्तले विद्यालयमार्फत बालबालिकालाई गुणस्तरीय शिक्षा दिनुपर्ने बताए ।
उनले भने, ‘बालबालिकालाई गणस्तरीय शिक्षा दिन नसकिए पछि पछुताउने अवस्था सिर्जना हुनेतर्फ सबै सचेत हुनुपर्छ ।’
उनले थपे, ‘कक्षा १२ पछि आशालाग्दो हिसावले आफूलाई अघि बढाउन नसक्ने र खाडी मुलुक हानिने अवस्था सिर्जना हुने अवस्था अब अन्त्य हुनुपर्छ ।’
पछिल्लो समयमा विद्यार्थी विदेश पलायन हुने क्रम बढेकामा चिन्ता व्यक्त गर्दै पन्तले यसलाई रोक्न गुणस्तरीय शिक्षा अपरिहार्य भएको बताए ।
पोखरास्थित ग्लोवल कलिजियटका प्राचार्यसमेत रहेका पन्तले विद्यार्थीलाई भाषाको पनि ज्ञान प्रदान गर्नुपर्ने बताए । भाषामा राम्रो गर्न नसकिए अवसर गुमाउनुपर्ने र जीवन नै वर्वाद हुन सक्ने भन्दै उनले यसतर्फ सबै विद्यालय र अभिभावकले ध्यान दिनुपर्ने बताए ।
अहिलेको शिक्षा प्रविधियुक्त हुनुपर्ने र गणितमा पनि विशेष जोड दिनुपर्ने पन्तले खाँचो औँल्याए । जोसँग अन्तर्राष्ट्रिय भाषाको ज्ञान छ उसले कहिल्यै दुःख नपाउने उनले स्पष्ट पारे । साथै पन्तले पोखरा युनाइटेड एकेडेमी सबै प्रकारले उत्कृष्ट विद्यालय रहेको बताए ।
उनले भने, ‘यहाँ पढ्ने विद्यार्थी धेरै ठाउँमा अब्बल देखिएका छन्, यसले विद्यालयको गरिमालाई पनि निकै माथि पुर्याएको छ ।’
