पोखरा । पोखरा महानगरपालिका वडा नं १६ लामाचौरस्थित नवआदर्श सामुदायिक विकास समाजले बुधबार आयोजना गरेको २५औं संस्करणको रक्तदानमा एक सय पाँच युनिट रगत संकलन भएको छ ।
प्रजातन्त्र दिवसको अवसरमा आयोजित कार्यक्रमको पोखरा-१६ का वडाध्यक्ष अमृत शर्मा तिमिल्सिना र पोखरा-१९ का वडाध्यक्ष पुष्पेन्द्र पाण्डेले संस्थाका पूर्व अध्यक्षद्वय बुद्धिबहादुर खत्री क्षत्री र नवीन भण्डारीलाई संयुक्त रुपमा ब्लडब्याग हस्तान्तरण गरी शुभारम्भ गरेका थिए ।
पूर्वअध्यक्ष क्षत्रीले गरेको रक्तदान नवआदर्शमा २३औं पटक र भण्डारीको २४औं पटक हो ।
कार्यक्रममा वडाध्यक्षद्वय तिमिसिल्सना र पाण्डेले रक्तदान जत्तिको महत्वपूर्ण कार्य अन्य हुन नसक्ने बताएका थिए । साथै उनीहरुले नवआदर्श सामुदायिक विकास समाज पोखराकै अब्बल संस्था रहेको भन्दै समाजका लागि निरन्तर सहयोग गर्ने प्रतिवद्धता जनाएका थिए ।
प्रादेशिक रक्तसंचार केन्द्रका महेन्द्र केसीले संघसंस्थाहरुको नियमित रक्तदान कार्यक्रमले प्रदेशमा निःशुल्क रगत उपलब्ध गरिँदै आएको बताए ।
युवा रेडक्रस सर्कल, गण्डकी बोर्डिङ स्कुल, एलसी ब्रदर्श युनाइटेड लामाचौर र जुनियर रेडक्रस सर्कल इन्द्रराज्य लक्ष्मी मावि लामाचौरको सहआयोजनामा कार्यक्रम भएको हो ।
संस्थाका अध्यक्ष दिनेश भण्डारीको अध्यक्षतामा भएको कार्यक्रममा द्वितीय उपाध्यक्ष हरिबहादुर थापाले स्वागत र सचिव शोभा बाँनियाले संचालन गरेका थिए ।
