पोखरा । पोखरा विश्वविद्यालयको २०औँ दीक्षान्त समारोह आज हुँदैछ । प्रधानमन्त्री एवं विश्वविद्यालयका कुलपति केपी शर्मा ओलीले सात हजार आठ सय ७२ विद्यार्थी दीक्षित गर्ने भएका छन् । कार्यक्रम पोखरा विश्वविद्यालय ढुंगेपाटन पोखरामा हुनेछ ।
शिक्षाविद् जोर्ज जोन प्रमुख अतिथि रहने कार्यक्रममा शिक्षा, विज्ञान तथा प्रविधिमन्त्री एवं विश्वविद्यालयका सहकुलपति विद्या भट्टराई पनि सहभागी हुँदैछन् ।
दीक्षान्त समारोहमा ३० जना विद्यार्थीलाई विशिष्ट पदक र सात सय ४५ विद्यार्थीलाई डीन लिस्टको उपाधिबाट सम्मानित गरिनेछ । हाल विश्वविद्यालयका चार वटा आंगिक क्याम्पस, तीन वटा संयुक्त आंगिक क्याम्पस तथा ५८ वटा सम्बन्धनप्राप्त कलेजमा ६८ वटा कार्यक्रम सञ्चालनमा छन् । जसमा करिब ४० हजार विद्यार्थी अध्ययनरत छन् ।
पोखरा विश्वविद्यालयले समयानुकूल पाठ्यक्रम परिमार्जन, एकेडेमिक क्यालेन्डरअनुसार तोकिएको मितिमा नै भर्ना, परीक्षा र परीक्षाफल प्रकाशन गर्दै विद्यार्थी आकर्षण बढाउन सफल भएको बताएको छ ।
गत वर्षको तुलनामा विद्यार्थी संख्या ३८ प्रतिशतले वृद्धि भएको जानकारी दिँदै विश्वविद्यालयले रोजगारी उन्मुख, प्रविधिमा आधारित पाठ्यक्रम लागू गरेको उल्लेख गरेको छ ।
साथै, परीक्षा समयमै सञ्चालन गर्ने र तीन महिनाभित्र परीक्षाफल प्रकाशन गर्ने नीति निरन्तर कायम राखेको विश्वविद्यालयले जनाएको छ ।
वार्षिक रूपमा एक हजार पाँच सयभन्दा बढी विद्यार्थीलाई निःशुल्क छात्रवृत्ति प्रदान गर्दै आएको विश्वविद्यालयले शिक्षा, अनुसन्धान र समुदाय सेवामा उल्लेखनीय योगदान दिइरहेको बताएको छ ।
