पोखरा । राष्ट्रिय स्वतन्त्र पार्टी (रास्वपा) ले गण्डकी प्रदेशको पर्यटन र संस्कृतिका लागि काम गर्न इच्छुक युवालाई पार्टीमा एकीकृत हुन आव्हान गरेको छ ।
रास्वपाका गण्डकी प्रदेशस्तरीय ‘पर्यटन तथा सांस्कृतिक विभाग’ का प्रमुख महेश भण्डारीले बुधबार एक विज्ञप्ति जारी गर्दै केन्द्र र प्रदेश स्तरीय समितिसँगै विभिन्न विभाग पनि विस्तार हुने क्रममा रहेको बताए । उनले गण्डकी प्रदेशमा रहेका ११ वटै जिल्लालाई समेट्ने गरी विभागलाई पूर्णता दिने बताए ।
’पार्टी सभापति रवि लामिछानेमाथि झुटा मुद्दा लगाएर पार्टीमाथि प्रतिशोध साँधेको छ’, जारी विज्ञप्तिमा भनिएको छ’, ‘साथसाथै प्रदेशभित्रका सबै जिल्लाका साथीसँग भेटघाट, छलफल र सल्लाह-सुझाव आदानप्रदानका लागि स्थलगत यात्रामा निस्कने तयारी छ, हामी गण्डकी प्रदेशका प्रत्येक जिल्ला सदरमुकाममा चाँडै पुग्नेछौँ ।’
प्रमुख भण्डारीले अपार पर्यटकीय र सांस्कृतिक संभावना रहेको गण्डकी प्रदेशको समग्र राजनीतिक, सामाजिक, आर्थिक र भौगोलिक विकासका लागि पर्यटन तथा संस्कृति विभागमार्फत पार्टीले धेरै काम गर्न सक्ने विज्ञप्तिमार्फत उल्लेख गरेका छन् ।
‘युवा सोचसहितका योजनामार्फत यस क्षेत्रको पर्यटन प्रवर्द्धन र संस्कृति जगेर्ना गर्नका लागि योगदान गर्न चाहने साथीहरू हामीसँग जोडिन सक्नुहुनेछ’, विज्ञप्तिमा भनिएको छ, ‘कुनै पनि साथीले हामीलाई फोन गर्न, इमेल गर्न सङ्कोच नमान्नुहोला । जिल्लास्तरीय यात्राको क्रममा सबै जिल्लाका साथीहरूमा खुला संवाद र भेटघाटको अपेक्षा गर्दछौँ ।’
प्रेस नोट:
प्रिय साथीहरू
सादर नमस्कार !
यहाँहरूलाई थाहा छ, राज्यले रास्वपा सभापति रवि लामिछानेमाथि झुटा मुद्दाहरू लगाएर पार्टीमाथि प्रतिशोध साँध्यो। यसको प्रतिरोधमा सिङ्गो पार्टी आन्दोलनमा उत्र्यो। साथै, पार्टी यतिखेर देशव्यापी संगठन विस्तारको अभियानमा छ। केन्द्र र प्रदेशस्तरीय समितिसँगै विभिन्न विभागहरू पनि बिस्तार हुने क्रममा छ।
गण्डकी प्रदेशमा रहेका एघार वटै जिल्लालाई समेट्ने गरी ‘पर्यटन तथा संस्कृति विभाग’ लाई पूर्णता दिने मेरो जिम्मेवारी अनुरूप प्रदेशभित्रका सबै जिल्लाका साथीहरूसँग भेटघाट, छलफल र सल्लाह-सुझाव आदानप्रदानको लागि स्थलगत यात्रामा निस्कने म र मेरो समूहको तयारी छ। हामी गण्डकी प्रदेशका प्रत्येक जिल्ला सदरमुकाममा चाँडै पुग्नेछौँ ।
विभागमा रहेर यस क्षेत्रको समस्त पर्यटन र संस्कृतिको लागि काम गर्न इच्छुक पार्टी भित्रका युवा साथीहरू हामीसँग जोडिन आव्हान गर्दछु। अपार पर्यटकीय र सांस्कृतिक संभावना रहेको यो प्रदेशको समग्र राजनीतिक, सामाजिक, आर्थिक र भौगोलिक विकासका लागि पर्यटन तथा संस्कृति विभागमार्फत हामीले धेरै कामहरू गर्न सक्छौँ। युवा सोचसहितका योजनाहरू मार्फत यस क्षेत्रको पर्यटन प्रवर्द्धन र संस्कृति जगेर्ना गर्नका लागि योगदान गर्न चाहने साथीहरू हामीसँग जोडिन सक्नुहुनेछ।
कुनै पनि साथीले हामीलाई फोन गर्न, इमेल गर्न सङ्कोच नमान्नुहोला। जिल्लास्तरीय यात्राको क्रममा सबै जिल्लाका साथीहरूमा खुल्ला संवाद र भेटघाटको अपेक्षा गर्दछौँ।
साथै, प्रजातन्त्र दिवसको अवसरमा यहाँहरू सबैलाई हार्दिक शुभकामना छ! हाम्रो मौलिकता र संस्कृति जत्तिकै महत्वपूर्ण छन् हाम्रो स्वतन्त्रता, समानता र सामाजिक न्यायका विषय। जय होस्!
स-धन्यवाद
तपाईंको महेश भण्डारी
प्रमुख : पर्यटन तथा संस्कृति विभाग
गण्डकी प्रदेश, राष्ट्रिय स्वतन्त्रत पार्टी
