पोखरा । पोखरा-मुग्लिन सडकखण्डअन्तर्गत पृथ्वी राजमार्ग आजदेखि आंशिक रुपमा बन्द हुने भएको छ । तनहुँको बन्दीपुर गाउँपालिका वडा नं ४ चुनपहरा क्षेत्रको सडक निर्माणका लागि आजदेखि एक महिना आँशिक रुपमा बन्द हुने भएको हो ।
राजमार्गको पूर्वी खण्ड योजनाले सूचना प्रकाशित गरी चैत ९ गतेसम्म सडक आँशिक बन्द हुने जनाएको छ ।
यातायात व्यवस्था कार्यालय बिमलनगरदेखि नयाँपुल करिब पाँच सय मिटर सडक खण्डमा आवश्यकता अनुसार समय-समयमा ४५ मिनेटदेखि एक घण्टासम्म सडक बन्द गर्न लागिएको सूचनामा उल्लेख छ ।
सडक बन्द गरिने अवधिमा साना सवारी साधन तथा मोटरसाइकल यात्रीले वैकल्पिक मार्ग प्रयोग गर्न अनुरोध गरिएको छ । वैकल्पिक सडकअन्तर्गत बिमलनगर, मस्र्याङ्दी पुल, कुमाल गाउँ हुदै नयाँपुल निस्कन सकिनेछ ।
आँबुखैरेनीबाट जामुनेसम्म ४१ दशमलव ४५ किलोमिटर दूरीमा सडक विस्तार भइरहेको हो । यस खण्डको हालसम्म करिब ८० प्रतिशत भौतिक प्रगति भएको छ ।
पूर्वी खण्डमा २७ दशमलव चार किलोमिटर दूरीमा अन्तिम चरणको कालोपत्रकार्य सम्पन्न भएको पूर्वीखण्डका सूचना अधिकारी विष्णुप्रसाद पाण्डेले जानकारी दिए ।
उनका अनुसार पहिलो चरणमा छ सेन्टिमिटर र दोस्रो चरणमा चार सेन्टिमिटर गरी दश सेन्टिमिटर सडक कालोपत्र गरिएको छ ।
उक्त सडक खण्डमध्ये ६९ किमी सडक दूरीमा दुई लेनका सडक कालोपत्रकार्य सम्पन्न गरिएको पूर्वीखण्डका सूचना अधिकारी पाण्डेले जानकारी दिए ।
पाण्डेका अनुसार अन्तिम चरणको कालोपत्र गर्ने काम भइरहेको छ । जिल्लाको डुम्रे, छिर्कन र दमौली खण्डमा निर्माण कार्य तीव्र गतिमा अघि बढाइएको छ ।
