पोखरा । अन्तर्राष्ट्रिय स्तरको रियालिटी शो ‘मेरो भ्वाइस युनिभर्स’ र ‘मेरो डान्स युनिभर्स’ सिजन-२ को पोखरा अडिसन फागुन १६ र १७ गते हुँदै छ ।
गण्डकी प्रदेशका सहभागीलाई समेट्ने गरी पोखराको पोखरा बहुमुखी क्याम्पसमा हुने अडिशनको तयारी पूरा भएको आयोजक इन्ट्रा-नेशनल वेलफेयर एण्ड सपोर्ट फाउण्डेसन अफ अमेरिकाले जनाएको छ ।
विश्वभर रहेका नेपालीको गायन र नृत्य क्षेत्रका उत्कृष्ट प्रतिभा पहिचान गर्नका लागि यी दुवै रियालिटी शो सञ्चालन हुँदैछ ।
साउनको अन्तिम साता काठमाडौँमा हुने फिनालेमा दुवै शोका विजेतालाई एक, एक करोड नेपाली रुपैयाँ पुरस्कार स्वरुप प्रदान गरिने छ भने दोस्रो हुनेलाई २५, २५ लाख रुपैयाँ र तेस्रो हुनेलाई १०, १० लाख पुरस्कार प्रदान गरिने आयोजकले जनाएको छ ।
पोखरा अडिसनका लागि सम्पूर्ण तयारी पूरा भएको फाउण्डेशनका गण्डकी प्रदेश प्रमुख राजेश बर्देवाले जानकारी दिए ।
फागुन १६ मा भ्वाइस अडिशन र १७ मा डान्स अडिशन हुनेछ । नेपाली संस्कृति र सांस्कृतिक पहिचानलाई संरक्षण, संवर्द्धन र उत्थान गर्नु फाउण्डेशनको मूलभूत उद्देश्य रहेको फाउण्डेशनका कास्की जिल्ला प्रमुख किसान सेवाले बताए ।
फाउण्डेसनका कार्यकारी निर्देशक सिएम भट्टराईले नेपाली कला संस्कृतिका माध्यमबाट सबैलाई एउटै सूत्रमा जोड्नका लागि र नेपालीभाषी प्रतिभालाई चिनाउन यस्तो खालको रियालिटी शो आयोजना गरिएको बताए ।
नेपाली कला, संस्कृति, संस्कार जस्ता कुरालाई नयाँ पुस्तालाई पुस्तान्तरण गर्न पनि यो रियालिटी शोले महत्वपूर्ण भूमिका खेल्ने उनको भनाइ छ ।
फाउण्डेशनका अनुसार दोस्रो संस्करणका लागि युरोप महादेशमा बेलायत र पोर्चुगल, पूर्वी एशियाका लागि थाइल्याण्ड, हङकङ र जापान, मध्यपूर्वका लागि दुबई र कतार, अष्ट्रेलियाका लागि सिड्नी, भारतका लागि सिलिगुरी र मुम्बई तथा नेपालका लागि विर्तामोड, नेपालगञ्ज, पोखरा र काठमाडौँमा अडिशन हुनेछन् ।
