पोखरा । ग्यास उद्योगीले आफ्ना सबै आन्दोलनका कार्यक्रम स्थगित गरेका छन् । मंगलबार उद्योग, वाणिज्य तथा आपूर्ति मन्त्रालयमा वाणिज्य तथा आपूर्ति सचिव गोविन्दबहादुर काकी, नेपाल एलपि ग्यास उद्योग संघका पदाधिकारीको उपस्थितिमा पाँच बुँदे सहमति भएकोसँगै आन्दोलन स्थगित भएको हो ।
आन्तरिकतर्फ ग्यासमा प्रतिसिलिण्डर १२ रुपैयाँ ७५ पैसाले मूल्य वृद्धि गर्ने सहमति भएको छ । तर उपभोक्तालाई भने मूल्य नबढ्ने नेपाल आयल निगमले जनाएको छ ।
यास उद्योगीलाई दिइँदै आएको मुनाफा प्रतिसिलिण्डर रकममा प्रदान गर्ने वा निश्चित प्रतिशतमा प्रदान गर्ने भन्ने सम्बन्धमा निगमले उपसमिति बनाई अध्ययन कार्य अगाडि बढाउने सहमति भएको छ ।
यस्तै निगम र संघ दुवैको समन्वयमा सम्बोधन गर्न सकिने माग निगम व्यवस्थापनले सम्बोधन गर्ने पनि सहमति भएको छ ।
निगमले सम्बोधन गर्न नसक्ने अन्य माग सञ्चालक समिति तथा उद्योग, वाणिज्य तथा आपूर्ति मन्त्रालयमा पेस गर्ने र नेपाल एलपी ग्यास उद्योग संघले आजदेखि एलपी ग्यासको आपूर्ति सहज बनाउने सहमति भएको छ ।
यसअघि पनि आन्दोलन शुरु गरेका ग्यास उद्योगीले सरकारले १५ दिनको समयसीमा मागेपछि आन्दोलन फिर्ता लिएका थिए । तर सरकारले १५ दिनभित्र माग पूरा गर्ने आश्वासन दिएर कार्यान्वयन नगरेको भन्दै उद्योगी आइतबारदेखि आन्दोलनमा उत्रिएका थिए ।
