पोखरा । पूर्वराजा ज्ञानेन्द्र शाहले पोखरा महानगरपालिका वडा नं. १० वीरेन्द्रचोकस्थित पूर्वराजा वीरेन्द्र शाहको शालिक अनावरण गर्ने भएका छन् ।
२०८० पुस ९ गते पुनःनिर्माण गरिएको वीरेन्द्रको शालिक आज ज्ञानेन्द्रले गर्ने भएका छन् । ज्ञानेन्द्र पूर्वराजा वीरेन्द्रका भाइ हुन् । वीरेन्द्रको वंशनाशपछि ज्ञानेन्द्रले राजगद्दी सम्हालेका थिए ।
आज दिउँसो ३ बजे शालिक अनावरण गर्ने कार्यक्रम रहेको नागरिक स्वागत मूल समारोह समिति सचिवालय संयोजक एवं राप्रपाका केन्द्रीय सदस्य अरुण गिरीले जानकारी दिए ।
शालिक आठ फिट अग्लो ढलोटको छ । शालिक निर्माणका लागि करिब २५ लाख रुपैयाँ खर्च लागेको थियो । यसअघि निर्मित शालिक माओवादी कार्यकर्ताले तोडफोड गरेर फालेका थिए । वीरेन्द्रको शालिक बनेदेखि नै सो चोकको नाम वीरेन्द्रचोक राखिएको छ ।
माघ २७ गतेदेखि पोखरामा रहेका शाह बुधबार बागलुङ पुगेका थिए । बागलुङमा उनले बागलुङ कालिका भगवती मन्दिरको दर्शन र नागरिकका स्वागत ग्रहण र केही नागरिकसँग भलाकुसारी गरेका थिए ।
त्यसअघि उनी फागुन १९ गते सोमबार विन्ध्यवासिनी मन्दिरको दर्शन गरेका थिए । पोखराको गणेशटोदेखि नै यात्रा गरेका शाहलाई हजारौँ नागरिकले स्वागत गरेका थिए ।
यसअघि उनी स्याङ्जा पुगेर शाहबंशीय कुल मन्दिर आलमदेवीमा पूजा गरेका थिए । यस बीचमा उनले पोखराको प्रशिद्ध केदारेश्वर महादेवमणि मन्दिर दर्शन गरेका थिए भने तालबाराहीको महाआरतीमा समेत सहभागी भएका थिए ।
