पोखरा । पोखरा महानगरपालिका वडा नं १३ आर्वास्थित बास्थला गनगने र पँधेराखोला खानेपानी तथा सरसफाई उपभोक्ता समितिको २०औं वार्षिक साधारणसभा शनिबार सम्पन्न भएको छ ।
सभाको उद्घाटन गर्दै पोखरा-१३ का वडाध्यक्ष किरण बरालले खानेपानी जस्तो संवेदनशील विषयमा वडा कार्यालयबाट आवश्यक पर्ने पाइप तथा प्राविधिकलगायत सबै सहयोग गर्ने प्रतिवद्धता जनाए ।
वडाध्यक्ष बरालले मौजुदा खानेपानीको अपुग हुने बित्तिकै लिफ्ट सिष्टमबाट नयाँ खानेपानी योजना सञ्चालन गर्ने वचन दिए । उनले भने, ‘आर्वामा अब लिफ्ट प्लान्टबाट उपभोक्ताकालाई खानेपानी उपलब्ध गराइने छ, हामीसँग धेरै योजना छन् जो तत्काल उपभोग गर्न सक्ने हुन्छन्’, उनले भने ।
विकास निर्माणमा आर्वा धेरै अघि बढिसकेको भन्दै उनले शिक्षा, स्वास्थ्य, खेलकुद, सडक निर्माण, खानेपानीलगायतमा आफू लागिरहेको भन्दै सबै उपभोक्ताले आआफ्नो ठाउँबाट सहयोग गर्न आग्रह गरे ।
समिति अध्यक्ष बद्रीप्रसाद देवकोटाको अध्यक्षतामा भएको साधारण कार्यक्रममा समिति संस्थापक अध्यक्ष नरबहादुर बरालले १७ वर्षसम्म आफूले समितिको नेतृत्व गर्दा र उपभोक्तालाई खानेपानी खुवाउने सवालमा पाएको दुःख हण्डर अनि अनुभव साट्दै उपभोक्ताको जिम्मेवारी नै महत्वपूर्ण रहने बताए ।
नेपाल पत्रकार महासंघका निवर्तमा सहसचिव श्रीराम सिग्देलले खानेपानी समिति हरेक उपभोक्ता हरबखत सचेत, चेतनशील र जिज्ञासु बन्नुपर्ने बताए ।
खानेपानी समितिले उपभोक्ता जागरण कार्यक्रम सञ्चालन गर्नुपर्ने आवश्यकता उनले औंल्याए ।
कार्यक्रममा समाजसेवी वसन्त शर्मा अधिकारी, जग्गादाता यमकुमारी बराल, अमरज्योती प्राविका प्रधानाध्यापक बिमलबहादुर बराल, उपभोक्ता देवराज पौडेल, राधाकृष्ण बराललगायतले बोलेका थिए ।
साधारणसभामा अध्यक्ष देवकोटाद्वारा प्रस्तुत वार्षिक प्रतिवेदन तथा कोषाध्यक्ष मधु बरालद्वारा प्रस्तुत आयव्यय प्रतिवेदन सर्वसम्वत पारित भएको थियो ।
कार्यक्रममा लामो समयदेखि खानेपानी समितिमा रहेर महत्वपूर्ण योगदान दिएकोमा नरबहादुर बराल, घनश्याम बराल, सावित्री सिग्देल, कुलप्रसाद बराल, रुद्रनाथ बराल, राधाकृष्ण बराल, गोबिन्दप्रसाद बराल र शकुन्तला परियारलाई सम्मान गरिएको थियो ।
अध्यक्ष देवकोटाको अध्यक्षतामा भएको कार्यक्रममा उपाध्यक्ष राजनकुमार सिग्देलले स्वागत तथा कार्यक्रम सञ्चालन सदस्य मुक्ति बरालले गरेका थिए ।
करिब दुई सय ८० उपभोक्ता रहेको खानेपानी समिति साविक आर्वाविजय गाविसका वडा नं २, ३, ४, ५ र ६ वडाका उपभोक्ता सदस्य छन् भने करिब आठ किमी टाढाबाट खानेपानी ल्याई उपभोक्तालाई मिटर सिष्टममार्फत पिउने पानी उपलब्ध गराइएको छ ।
