पोखरा । पोखरा महानगरपालिका वडा नं १७ ले टपरी गास्ने तथा धूप वत्ति बाट्ने प्रतियोगिता आयोजना गर्याे ।
एक सय १५औँ अन्तर्राष्ट्रिय महिला श्रमिक दिवसको अवसरमा ‘सबै महिला तथा बालिकाका लागिः अधिकार, समानता र सशक्तीकरण’ भन्ने मूल नाराका वडा कार्यालयले प्रतियोगिता आयोजना गरेको हो ।
प्रतियोगितामा वडाभित्रका आमा, दिदीबहिनी र महिला समूह गरी २१ समूहले प्रतिस्पर्धा गरेका थिए । जसमा टपरी गास्ने प्रतियोगितामा छिमेकी आमा समूह प्रथम हुँदै १० हजार रुपैयाँ नगद पुरस्कार प्राप्त गरेको छ ।
यस्तै जनजागर आमा समूह द्वितीय हुँदै सात हजार, लगनशील आमा समूह तृतीय हुँदै पाँच हजार, संकल्प आमा समूहले सान्त्वना स्थान हासिल गर्दै तीन हजार रुपैयाँ नगद पुरस्कार जितेको छ ।
यता, धूपवत्ति बाट्ने प्रतियोगितामा शितलपथ आमा समूह प्रथम हुँदै १० हजार, ड्यामसाइड टोल विकास आमा समूह द्वितीय हुँदै सात हजार, छिमेकी आमा समूह तृतीय हुँदै पाँच हजार र श्रीराम जानकी शान्तिपथ आमा समूहले सान्त्वना स्थान हासिल गर्दै तीन हजार रुपैयाँ नगद पुरस्कार जित्न सफल भए ।
कार्यक्रम उद्घाटन गर्दै पोखरा महानगरपालिकाकी उपप्रमुख मञ्जुदेवी गुरुङले महिलालाई आत्मनिर्भर स्वाभलम्वी बनाउन प्रतियोगिताले महत्वपूर्ण भूमिका खेल्ने बताइन् ।
उनले महिलाहरु चुलो र चौकामा मात्र सीमित नबनि बाहिर निस्किएर आफ्ना क्षमता अभिवृद्धि गर्दै आयआर्जनमा पनि जोडिनुपर्नेमा जोड दिइन् ।
वडाध्यक्ष राधिका शाही योगीले महिलालाई उद्यमसँग जोड्न वडा कार्यालयले धेरै नै प्रयास गरिरहेको बताइन् । उनले प्रतियोगिताले महिलाको क्षमतामा अझै निखारता ल्याउने र घरमै बसेर स्वरोजगार बन्न सघाउने दावी गरिन् ।
महिलाले उत्पादन गरेका सामग्रीले बजार पाउन सकेन भने वडा कार्यालयले जिम्मा लिने उनको भनाइ छ । धर्म, संंस्कार र संस्कृति संरक्षणमा पनि महिलाको भूमिका महत्वपूर्ण रहेको वडाध्यक्ष शाहीले बताइन् ।
कार्यक्रममा गुप्तेश्वर महादेव गुफा व्यवस्थापन समिति अध्यक्ष लक्ष्मण बास्तोला, कार्यक्रम संयोजक एवं वडासदस्य विष्णुकुमारी थापा भुजेल, वडासदस्य विक्रम गुरुङ, पोखरा-१७ का वडासचिव सुरेन्द्र शर्माका साथै सहभागीका तर्फबाट शितलपथ आमा समूहका अध्यक्ष सुमित्रा लम्साल र छिमेकी आमा समूहका अनिता पनेरुलगायतले बोलेका थिए ।
वडाध्यक्ष शाहीको अध्यक्षतामा भएको कार्यक्रममा संयोजक भुजेलले स्वागत र सञ्चालन वडाका कर्मचारी तिर्सना बरालले गरेकी थिइन् ।
तस्बिरहरू
