पोखरा । विश्व हिन्दू महासंघले कोटीहोम गरेरै छाड्ने जनाएको छ ।
विश्व हिन्दू महासंघ नेपाल गण्डकी प्रदेश र संस्कृत युवा मञ्च नेपालले आयोजना गरेको पत्रकार सम्मेलनमा महासंघका उपाध्यक्ष शंकर खरालले कोटीहोम गर्नका लागि अदालतले समेत बाटो खुला गरिदिएकाले गरेरै छाड्न बताएको हो ।
सनातन धर्म जोगाउने कोटीहोम बिथोल्नका लागि विभिन्न षड्यन्त्र भइरहेको उनले आरोप लगाए ।
मानव सेवा फाउण्डेससँग कोटीहोममा उठेको रकम पोखरा र आसपासमै खर्च गर्ने सहमतिपछि आफूहरुले साथ दिएको भन्दै उनले गुरुको आचरणको पछि नलागि उद्देश्यको पछि लाग्न उनको आग्रह थियो ।
पोखराले घोषणा गरेको पोखरा भ्रमण वर्षलाई सघाउनका लागि आयोजना गरिएको सघाउने कोटीहोमका विरुद्धमा केही तत्व लागिरहेको उनले सुनाए ।
खरालले भूमि पुजन क्षेत्रमा भएको विवादपछि बेलुका सञ्चारमाध्यममा आएको अडिओ आफ्नै भएको स्वीकार गरे ।
महानगरका प्रवक्ता र आफ्नो दाजुभाइको सम्बन्ध रहेकाले रिसका बेलामा बोलिएको कुरालाई मिडियाबाजी गरिएको उनले आरोप लगाए । मिडियाले पनि एकतर्फी मात्र आवाज राखेको उनको भनाइ थियो ।
पोखरा महानगरले दोहोरो चरित्र प्रस्तुत गरिरहेको उनको आरोप छ । सुरुमा महानगरकै वडाबाट स्विकृत लिएको विषयमा महानगरले हस्तक्षेत्र गरेको उनको भनाइ थियो । तर, महानगरले रोक्दैमा कोटीहोन नरोकिने उनको तर्क थियो । कोटीहोम र सनातन धर्म रक्षाका लागि आफूहरु डटेर लाग्ने उनले बताए ।
