पोखरा । प्रथम पोखरा कप राष्ट्रिय पुरूष ह्याण्डबल प्रतियोगितामा सात टिम भिड्ने भएका छन् ।
प्रतियोगिता गण्डकी प्रदेश ह्याण्डबल संघको आयोजना तथा प्रदेश खेलकुद परिषद गण्डकीको प्रवर्द्धन तथा कास्की जिल्ला ह्याण्डबल संघको प्राविधिक सहयोगमा आइतबारबाट सुरू हुनेछ ।
करिब तीन वर्षको अन्तरालमा राष्ट्रियतस्तरको ह्याण्डबल प्रतियोगता हुन लागेको हो । प्रतियोगितामा आयोजक गण्डकीसहित कोशी, लुम्बिनी, कर्णाली, सुदूरपश्चिम प्रदेश र दुई विभागीय टोली नेपाल आर्मीको त्रिभुवन आर्मी क्लब र सशस्त्र प्रहरीको एपीएफ क्लब भिड्ने छन् ।
आयोजक प्रदेश ह्याण्डबल संघकी उपाध्यक्ष शान्ती थापा वैद्यका अनुसार प्रतियोगिता पोखरा रंगशालास्थित बहुउद्देश्यीय रंगशालामा हुनेछ ।
लिग कम नकआउटका आधारमा सञ्चालन हुने प्रतियोगिता पहिलो दिन चार खेल हुनेछन् ।
प्रतियोगिता उद्घाटन प्रदेश खेलकुद परिषद् गण्डकीका सदस्यसचिव श्रीधर शर्माले गर्ने ह्याण्डबल संघका उपाध्यक्ष गिरमान गुरूङले जानकारी दिए ।
प्रतियोगिता विजेताले नगद एक लाख, उपविजेताले ५० हजार र तेस्रो हुनेले ३० हजार रुपैयाँ नगद पुरस्कारसहित ट्रफी, मेडल तथा प्रमाणपत्र प्राप्त गर्नेछन् ।
यस्तै उत्कृष्ट गोलरक्षक, उत्कृष्ट खेलाडी र सर्वाधिक गोलकर्ताले जनही पाँच हजार रुपैयाँ नगद पुरस्कार प्राप्त गर्नेछन् ।
