पोखरा । पोखरेली युवा सांस्कृतिक परिवारले नियमित रुपमा गर्दै आएको कार्यक्रम ‘समता काव्य सन्ध्या’ को तीन सय ७९औं शृंखला सम्पन्न भयो । शृंखलामा साहित्यकार डा. ईश्वरमणि अधिकारी सन्ध्या नायक बनेका थिए ।
कार्यक्रममा सन्ध्या नायक अधिकारीले सानुसाथी, जानेहरूलाई, फरार, सम्बोधिका र साबिती शीर्षकका पाँच वटा कविता वाचन गरेका थिए ।
कवि अधिकारीले कविता लेख्नु आफ्ना लागि जीवन जिउने यौटा कला तथा साधना भएको स्पष्ट पारे ।
उनले पोयुसांप आफ्ना लागि कविताको घर र आराधना गर्ने थलो रहेको भन्दै आफू १७औँ सन्ध्यादेखि समतासँगै रहेको स्मरण गरे ।
कार्यक्रममा कवि तीर्थ श्रेष्ठले समता काव्य सन्ध्याले तीन दशकको यात्रामा नेपाली साहित्यले गर्व गर्ने डा अधिकारी जस्तै थुप्रै साहित्यकार जन्माइसकेको भन्दै खुसी व्यक्त गरे ।
परिवारकी सल्लाहकार सरस्वती प्रतीक्षाले कवि अधिकारी एकसाथ मष्तिस्कका दुइटै पाटा उत्तिकै सक्रिय ढंगले चलाउने अदभूत प्रतिभा भएको साहित्यकार र गणितज्ञ भएको उल्लेख गरिन् ।
साहित्यकार दीपक समीपले कवि वासुशशिका बारेमा जानकारी दिए ।
कार्यक्रममा सरस्वती श्रेष्ठ ‘सरु’ जगन्नाथ रेग्मी, भूमिराज बस्ताकोटी, अमृत क्षेत्री, तारानाथ पराजुली, शरण आँशु, पूर्णिमा प्रतिबिम्ब, हिममाया पौडेल, अमृता पोखरेल, छन्दिका, समीप बैरागी, दीर्घराज गिरी ‘प्रियसी’ले आफ्ना रोज्जा कविता वाचन गरेका थिए ।
कार्यक्रमको अध्यक्षता परिवारका उपाध्यक्ष अध्यक्ष लक्ष्मण थापाले गरेका थिए भने साहित्य विभाग संयोजक केशु शर्मा र सचिव एमडी काफ्लेले बोलेका थिए ।
