पोखरा । प्रधानमन्त्री कप पुरूष राष्ट्रिय क्रिकेट प्रतियोगितामा गण्डकी प्रदेशले चौथो हार व्यहोरेको छ । मंगलबार भएको खेलमा बागमतीले गण्डकी प्रदेशलाई ६९ रनले हराएको हो । गण्डकी यसअघिका तीन खलमा पनि पराजित भएको थियो ।
बागमतीका लागि इशान पाण्डेले अर्धशतक बनाउँदै बलिङमा चार विकेट पनि लिएपछि बागमती प्रदेशले विजयी भएको हो ।
बागमतीले दिएको दुइ सय ८९ रनको बलियो लक्ष्य पछ्याएको गण्डकी ४४ ओभरमा दुइ सय १९ रनमा अलआउट भयो ।
वंश क्षेत्रीले अर्धशतक बनाए पनि पर्याप्त हुन सकेन । उनले सर्वाधिक ५५ रन बनाए । समीर कँडेलले २६ तथा अमृत गुरुङले २० रन बनाए ।
बागमतीका लागि इशानले ६ ओभरमा २७ रन दिएर चार विकेट लिए । साकार गजुरेलले दुइ विकेट लिए भने रिजन ढकाल, गौतम केसी र सुर्य तामाङले एक-एक विकेट लिए ।
सिद्धार्थ क्रिकेट रंगशालामा त्यसअघि टस हारेर पहिले ब्याटिङको निम्तो पाएको बागमतीले इशान, शुभ कंसाकार र बिपिन आचार्यको अर्धशतकमा ५० ओभरमा आठ विकेट गुमाएर दुइ सय ८८ रन बनाएको थियो ।
इशान पाण्डेले सर्वाधिक ६९ रन बनाएका थिए भने बिपिन ६३ रनमा अविजित रहे । शुभ कंसाकारले ५२ रन बनाए । दुइ सय ११ रन बनाउँदा आठ विकेट गुमाएको बागमतीका लागि बिपिनले रिजन ढकालसँग मिलेर अविजित ७८ रनको साझेदारी गर्दै बलियो योगफलमा पु¥याएका हुन् ।
बिबेक मगरले ३४ रन बनाउँदा रिजन ढकाल २३ रनमा अविजित रहे । गण्डकीका लागि अर्जुन कुमालले सात ओभरमा ४० रन दिएर चार विकेट लिए । कप्तान बिपिन खत्री र सुबास भण्डारीले दुइ-दुइ विकेट लिए ।
बागमतीले पाँच खेल खेल्दा दुई जितसहित चार अंक जोडेर अंकतालिकामा छैटौं स्थानमा उक्लिएको छ । गण्डकीले हालसम्म पाँच खेल खेल्दा एक जित मात्र निकालेको छ र दुई अंकसहित आठौं स्थानमा छ ।
