पोखरा । म्याग्दीमा आज बिहान जीप दुर्घटना हुँदा एक जनाको घटनास्थलमै मृत्यु भएको छ भने अन्य चार जना घाइते भएका छन् । मृत्यु हुनेमा मालिका गाउँपालिका वडा नं ४ च्यूरीबोटका ३१ वर्षीय नगेन्द्र रसाइली छन् ।
सोही दुर्घटनामा गम्भीर घाइते भएका चालक ३३ वर्षीय शेरबहादुर बिकलाई थप उपचारका लागि पोखरा ल्याइएको जिल्ला प्रहरी कार्यालय म्याग्दीका डीएसपी भरत श्रेष्ठले जानकारी दिए ।
साथै अन्य घाइतेमा च्युरीबोटकै ३१ वर्षीय नगेन्द्र गोतामे, २२ वर्षीय भीमप्रसाद गोतामे घाइते र यमिन्द्र रसाइली छन् । जसमा नगेन्द्रको दरबाङ आधारभूत अस्पतालमा उपचार भइरहेको छ भने भीम र यमिन्द्रको अवस्था सामान्य छ ।
आज बिहान करिब ६ बजे मालिका गाउँपालिका वडा नं ४ महभिर सुङ्रेपानीबाट च्यूरीबोटतर्फ जाँदै गरेको ग१ज ५६१२ नम्बर बोलेरो जीप महभिरको सुङ्रेपानीमै दुर्घटना भएको हो ।
जीप अनियन्त्रित भइ सडकबाट करिब ६० मिटर तल खसेको डीएसपी श्रेष्ठले जानकारी दिए । दुर्घटनाबारे थप अनुसन्धान भइरहेको प्रहरीले जनाएको छ ।
