पोखरा । पोखरामा अन्तर्राष्ट्रिय नाटक महोत्सव हुने भएको छ । निट फेस्टसँगको सहकार्यमा पोखरा थियटरले तेस्रो नेपाल अन्तर्राष्ट्रिय नाटक महोत्सव २०२५ गर्न लागेको हो । महोत्सवमा पाँच देशका छ नाटक मञ्चन गरिने महोत्सवका निर्देशक परिवर्तनले जानकारी दिए ।
चैत ९ गते शनिबारबाट शुरु हुने महोत्सव चैत १२ सम्म चल्नेछ । महोत्सवमा चीन, ट्युनिसिया, नर्वे, जापानका नाटक देखाइने छन् । पोखरालाई सांस्कृतिक र पर्यटन गन्तव्यका रुपमा स्थापित गर्ने उद्देश्य महोत्सव आयोजना गरिएको परिवर्तनले बताए ।
पोखरा थियटरले तयार गरेका नाटक ‘मुनामदन’ मञ्चन गरेर महोत्सव शुभारम्भ हुनेछ । मुनामदनलाई मौलिक रुपमा केही परिवर्तन गरी गन्धर्वले सुनाएको गाथाका रुपमा यसमा चित्रण गरिएको छ । महोत्सवले नेपाली नाटक क्षेत्रलाई अघि बढाउन योगदान गर्ने विश्वास व्यक्त गरिएको छ ।
उनका अनुसार चीनको मिनी ओपेरा, जापानको डान्स ड्रामा जस्ता फरक फरक खालका नाटक मञ्चन हुनेछन् । नाटकबारे विश्वमा कास्तो अभ्यास भएको छ, हामी के गरिरहेका छौँ भन्ने यसले ज्ञान दिने उनको दावी छ ।
महोत्सवमा फोरम थियटर र कार्यशालासमेत हुनेछन् । संस्कृतिकर्मी, पर्यटन व्यवसाी, सञ्चारकर्मी, नाट्यप्रेमीबिच विशेष सेसनहरु समेत हुने आयोजकले जनाएको छ ।
महोत्सवको पहिलो दिन दिउँसो ‘मुनामदन’ मञ्चन हुनेछ भने साँझ इन्द्रेणी थियटरको प्रस्तुतिमा ‘इम्ब्रोनिक’ नाटक देखाइनेछ ।
चैत १० गते ‘द स्टेज इज कलिङ यु’ शीर्षकमा कलाकार दिया मास्के र प्रकाश घिमिरेसँग संवाद हुनेछ । सोही दिन साँँझ ट्युनिसियाको नाटक मञ्चन पोखरेली थियटरमा मञ्चन हुनेछ ।
महोत्सवको तेस्रो दिन ११ गते चीनको मिनी ओपेर दर्शकले हेर्न पाउनेछन् । दिउँसो चार घन्टा लामो ‘द चार्मिङ जिन्जु ओपेरा’ चल्नेछ ।
सोही दिन साँझ पोखरा सांस्कृतिक पर्यटनको केन्द्र कसरी हो भन्ने विषयमा पोखराका नगर प्रमुख धनराज आचार्य र संस्कृतिकर्मी तीर्थ श्रेष्ठसँग संवाद तय छ ।
महोत्सवको अन्तिम दिन चैत १२ गते जापानको नाटक ‘मास्टर सोको एन्ड मार्गरिटा’ पोखरा थियटरमा देखाइनेछ । साँझ नेपाली र नर्वेली कलाकारले अभिनय गरेको नाटक ‘द रोज’ मञ्च हुनेछ ।
महोत्सवभर पद्याप्रेम थियटरले मौलिक धुनमा साथ दिनेछ भने किताब, हेन्डीक्राफ्ट, फोटोग्राफीका प्रदर्शनी पनि महोत्सव परिसरमा हुनेछ । महोत्सव गर्न ३० लाख खर्च हुने अनुमान गरिएको छ ।
