पाेखरा । मुस्ताङ भ्रमणका क्रममा लेक लागेर एक वर्षमा ११ पर्यटकको ज्यान गएको छ । यो तथ्यांक २०८१ वैशाखदेखि हालसम्मको हो । मृत्यु हुनेमा दुई नेपाली र नौ विदेशी पर्यटक छन् ।
जिल्ला प्रहरी कार्यालय मुस्ताङका सूचना अधिकारी, प्रहरी निरीक्षक विशाल अधिकारीका अनुसार मृत्यु हुनेमा सबैभन्दा बढी भारतीय पर्यटक छन् ।
मुस्ताङ पुग्नेमध्ये पाँच जनाको वारागुङ मुक्तिक्षेत्र गाउँपालिका १ स्थित मुक्तिनाथमा, पाँच जनाको घरपझोङ गाउँपालिका वडा नं ४ जोमसोममा र एक जनाको थासाङ गाउँपालिका वडा नं २ मा लेक लागेर मृत्यु भएको प्रहरी निरीक्षक अधिकारीले बताए । लेक लागेर मृत्यु हुनेमा अधिकांश ज्येष्ठ नागरिक छन् ।
प्रहरीको तथ्याङ्क अनुसार २०८१ वैशाखमा दुई, जेठमा एक, असोजमा दुई, कात्तिकमा पाँच र पुसमा एक पर्यटकको लेक लागेर मृत्यु भएको हो । लेक लागेर मृत्यु हुनेमा ६३ वर्षीय अमेरिकी नागरिकसमेत रहेको प्रहरी निरीक्षक अधिकारीले बताए ।
२०८० मा भने १७ जनाले लेक लागेर ज्यान गुमाएका थिए । जसमा ११ विदेशी तथा छ नेपाली नागरिक थिए ।
मुस्ताङ जोमसोम, कागवेनी, मुक्तिनाथ, कोरलालाई प्रमुख पर्यटकीय गन्तव्य मानिन्छ । मुक्तिनाथमा धार्मिक पर्यटकको घुँइचो लाग्छ ।
