पोखरा । पोखरामा सम्पन्न ‘चिया र गफ-सुपर कप टि-२० क्रिकेट प्रतियोगिताको उपाधि न्यूरोड हबले जितेको छ ।
पोखरा महानगरपालिका शिक्षा महाशाखाको सहयोग तथा पोखरा महानगरपालिका क्रिकेट संघको आयोजना र व्यवस्थापनमा शुक्रबार सम्पन्न प्रतियोगितामा चार अंक जोडेको न्यूरोड हब प्रतियोगिताको च्याम्पियन बनेको हो ।
न्यूरोड हबले पहिलो दिन लेखनाथ ईगल्सलाई सात विकेट र अन्तिम दिन लेकसाईड फाल्कोनलाई तीन विकेटले पराजित गरेको थियो ।
समान खेलमा लेखनाथ ईगल्सले एक खेल जितेर दुई अंक बटुल्दै दोस्रो हुँदा लेकसाइड फाल्कोन जितिविहीन् बन्दै अंक तालिकाको पुछारमा चित्त बुझाउन बाध्य भयो ।
खेलमा न्यूरोड हबले लेकसाईड फाल्कोनलाई तीन विकेटले पराजित गर्याे । टस जितेर ब्याटिङ रोजेको लेकसाईड फाल्कोनले १८दशमलव३ ओभरमा नौ विकेट गुमाएर एक सय २७ रन बनायो ।
लेकसाइड फाल्कोनका लागि हरिशंकरले २० बलमा २३ रनको योगदान दिए । लेकसाईडलाई कम रनमा समेट्न रोहन चौधरीले चार ओभरमा १५ रन खर्चेर पाँच विकेट तथा प्रमोद बास्तोलाले चार ओभरमै ३० रन खर्चेर तीन विकेट हत्याए ।
एक सय २८ रनको लक्ष्य पछ्याएर जवाफी ब्याटिङमा उत्रिएको न्यूरोड हबले १८दशमलव१ ओभरमा सात विकेट गुमाउँदै लक्ष्य पूरा गर्याे ।
न्यूरोड हबका लागि प्रमोद बास्तोलाले ३३ बलमा ४० रन र कविन सापकोटाले २७ बलमा २९ रनको योगदान दिए । न्यूरोड हबका अनिष रावतले तीन ओभरमा ११ रन खर्चेर तीन विकेट लिए पनि हार टार्न सकेनन् । प्लेयर अफ दी म्याच रोहन चौधरी बने ।
प्रतियोगिताको प्लेयर अफ दी सिरिज भने प्रमोद बास्तोला बने । विजयी टोलीलाई पोखरा महानगरपालिका क्रिकेट संघका अध्यक्ष वीरेन्द्र पुनलगायतले पुरस्कार वितरण गरेका थिए ।
