पोखरा । राष्ट्रिय स्वतन्त्र पार्टीकी सांसद सोविता गौतमले संसदको हिउँदे अधिवेशन नियन्त्रणमुखी भएको आरोप लगाएकी छन् ।
मंगलबार संसद भवन बाहिर सञ्चारकर्मीसँग कुरा गर्दै उनले यस्तो बताएकी हुन् । उनले रास्वपाको बुझाइमा चुनौतिपूर्ण र नियन्त्रणमुखी रहेको आरोप लगाइन् ।
उनले कानून निर्माणका केही प्रक्रिया संसदीय अभ्यासमा स्वभाविक रुपमा अलिकति अघि बढेको महसुस आफूहरुले गरेको बताइन् ।
उनले रास्वपा सभापति रवि लामिछानेमाथिको निलम्वनको प्रक्रियालाई लिएर नियन्त्रणमुखी महसुस गरेको बताइन् ।
उनले भनिन्, ‘यो अधिवेशन हाम्रो बुझाइमा अत्यन्तै चुनौतिपूर्ण हामीले देख्यौँ, कानून निर्माणका केही प्रक्रिया संसदीय अभ्यासमा स्वभाविक रुपमा अलिकति अगाडि बढेको महसुस भयो ।’
उनले थपिन्, ‘अन्य धेरै विषय अलि नियन्त्रणमुखी ढंगबाट प्रस्तुत भए भन्ने बुझाइ छ, हाम्रो पार्टी सभापति रवि लामिछाने माथिको निलम्वनको प्रक्रिया हामीले अलिकति नियन्त्रण महसुस गरिरहेका हौँ, त्यसकारण संसदको गएको अधिवेशन अभ्यासका हिसाबले निकै चुनौतिपूर्ण, नियन्त्रणमुखी भएको महसुस गरेका छौँ ।’
उनले नेपालमा सबै विषयवस्तुलाई राजनीतिक दृष्टिकोणबाट हेर्ने गरिएकोप्रति आपत्ति जनाइन् ।
