बागलुङ । बागलुङको गलकोटमा जीप दुर्घटना हुँदा एक युवकको ज्यान गएको छ भने तीन जना घाइते भएका छन् ।
मृत्यु हुनेमा गलकोट नगरपालिका वडा नं ११ रिघाका २२ वर्षीय विष्णु राना छन् ।
जिल्ला प्रहरी कार्यालय बागलुङका अनुसार दुर्घटनामा गम्भीर घाइते भएका रानाको गलकोट नगर अस्पतालका उपचारको क्रममा मृत्यु भएको हो ।
दुर्घटनामा परी घाइते हुनेमा जीप चालक गलकोट नगरपालिका वडा नं ५ सर्दाखेतका २२ वर्षीय राजन विक, गलकोट ४ डाँडाखेतका १९ वर्षीय रमेश सुनार, गलकोट-३ बोहराफाँटका १९ वर्षीय अशोक बोहरा छन् । उनीहरुको गलकोट नगर अस्पतालमा उपचार भइरहेको डीएसपी विजय यादवले जानकारी दिए ।
गलकोट नगरपालिका वडा नं ३ खसगाउँबाट हटियाको कोटमैदानतर्फ जाँदै गरेको ग१ज ६१०० नम्बरको जीप खसगाउँमा दुर्घटना भएको प्रहरीले जनाएको छ ।
कच्ची सडकमा जीप अनियन्त्रित भई सडकदेखि अन्दाजी एक सय मिटर तल खसेको हो । घटनाको खरबलगत्तै प्रहरी चौकी हटियाको टोली र स्थानीयले घाइतेको उद्वार गरी अस्पताल पुर्याएका थिए ।
दुर्घटना हुनुको कारण खुल्न नसकेको र थप अनुसन्धान भइरहेको प्रहरीले जनाएको छ ।
