गण्डकी प्रदेशका मुख्यमन्त्री सुरेन्द्र पाण्डेले प्राकृतिक विपद्को उद्धारका लागि प्रदान गरिने सामग्री अब एकद्वार प्रणालीबाट हस्तान्तरण गर्ने बताउनुभएको छ ।
शुक्रवार पोखरामा प्रादेशिक आपत्कालीन गोदामघर हस्तान्तरण कार्यक्रमलाई सम्बोधन गर्दै उहाँले यस्तो बताउनुभएको हो । उहाँले गण्डकी प्रदेश प्राकृतिक विपदको हिसावले जोखिम क्षेत्र भएकाले सम्भावित दुर्घटनाको आँकलन गरी उद्धारका कार्यहरु तयारी गर्नुपर्ने बताउनु भयो । उहाँले विपद् उद्धारका लागि आवश्यक सामग्री वितरणका लागि गोदामघरले सहजता दिने बताउनु भयो । गोदमघरमार्फत विपदका सामग्री एकद्वार प्रणालीबाट वितरण गर्दा उद्धारमा छिटो र सहज तरिकाले गर्न सकिने उहाँको भनाइ छ । उहाँले उद्धार कार्यमा सुरक्षा निकायको परिचालनका लागि आवश्यक सम्बोधन प्रदेश सरकारले गर्ने बताउनु भयो ।
उहाँले भन्नुभयो, ‘उद्धार, प्रतिकार्य, उद्धारपछिका कार्यहरु गर्दाखेरि चाहिने जे जे सामानहरु छन् यस्लाई प्रदेश सरकारको मातहतबाट एकद्धार प्रणालीबाट हस्तान्तरण गर्न सहज हुनेछ । त्यस्तै हामीले आफ्नै पनि प्रदेश सरकारले गोदाम घर छुट्टै राखेकै थियो । अब यी सामानहरु र सरकार मातहत रहेका सामानहरु एकै ठाउँमा गोदामघरमा ल्याइसकेपछि यसलाई वितरण गर्न सहज हुनेछ । र दोहोरो पन पनि कम हुन्छ भन्ने लाग्दछ । गण्डकी प्रदेश अलिकति जोखिमयुक्त प्रदेश नै हो विपदको दृष्टिकोणबाट । बाढी पहिरोको जोखिम हाम्रो प्रदेशमा अलिकति बढी नै छ । त्यसले गर्दा पनि समयमै यस्ता सामानहरु हस्तान्तरण गर्ने समयमै उद्धार गर्ने सहज हुने विश्वास लिएका छौँ । सुरक्षा निकायलाई परिचालन गर्न र समयमा नै सुरक्षा निकायको तर्फबाट विपद्लाई सम्बोधन गर्नसक्ने हिसावले केही सहयोग पनि हामीले गर्दै आइरहेका छौँ ।’
मुख्यमन्त्री पाण्डेले विपद् उद्धारका लागि नेपाल प्रहरी, सशस्त्र प्रहरी र नेपाली सेनाको मागअनुसार सामग्री दिन नसके पनि सरकारले न्युनतम उद्धारका सामग्री दिँदै आएको बताउनु भयो ।
