पोखरा । प्रेस स्वतन्त्रताको संरक्षण र संवर्द्धनमा जोड दिँदै नेपालका पत्रकारहरूले पनि आज विश्व प्रेस स्वतन्त्रता दिवस मनाउँदैछन् । सन् १९९३ को संयुक्त राष्ट्रसङ्घको साधारणसभाले अनुमोदन गरेपछि यो दिन संसारभरि प्रेस स्वतन्त्रता दिवस मनाउन थालिएको हो ।
हरेक वर्षको मे ३ तारिखमा विश्वभरि सञ्चार माध्यमको स्वतन्त्रताका मुद्दा, मापदण्ड र महत्वको विषयमा पैरवी अनि बहस गरिँदै समाचार सङ्कलनका क्रममा जोखिममा परेका र ज्यान गुमाएका पत्रकारको योगदानको सम्झना र सम्मान गर्दै मनाइन्छ ।
संयुक्त राष्ट्र सङ्घीय युनेस्कोको आह्वानमा यो दिवस मनाइने क्रमको सुरुआत भएको हो । प्रेस स्वतन्त्रता सञ्चारमाध्यमको मात्र मुद्दा नभई समग्र समाज र लोकतान्त्रिक प्रणालीको अभिन्न विषय भएको बताउँदै पत्रकारहरूले यसको संरक्षणका लागि नीतिगत, कानुनी र संरचनागत सुदृढीकरणको माग पनि गरेका छन् । वर्ष २०२४ को मे ३ मा संयुक्त राष्ट्र महासभाले प्रेस स्वतन्त्रताको लागि अन्तर्राष्ट्रिय दिवस घोषणा गरेको ३१ वर्ष पूरा हुँदैछ ।
यस वर्षको दिवसको नारा ‘पृथ्वीका लागि प्रेस, वातावरणीय संकटको सामनामा पत्रकारिता’ भन्ने तय भएको छ । यस वर्ष प्रेस स्वतन्त्रता दिवस पूर्णत जववायू र वातावरणीय परिवर्तनको लागि केन्द्रित छ ।
प्रेस स्वतन्त्रा दिवसको अवसरमा नेपाल पत्रकार महासंघ कास्की, नेपाल पत्रकार महासंघ गण्डकीसहित केन्द्रीय समितिले शुभ कामना व्यक्त गरेको छ । साथै देशभरका पत्रकार महासंघले विभिन्न कार्यक्रम आयोजना गरेका छन्।
