पोखरा । नेपाली काँग्रेसका प्रमुख सचेतक श्यामकुमार घिमिरेले सरकारले प्रश्तुत गरेको अगामी आर्थिक वर्षको नीति तथा कार्यक्रम आर्थिक अभावका कारण कार्यान्वयन गर्न चुनौतीपूर्ण रहेको बताउनुभएको छ ।
संसद भवन परिसर नयाँ बानेश्वरमा सोमवार सञ्चारकर्मीहरुसँग कुराकानी गर्दै प्रमुख सचेतक घिमिरेले कतिपय नीति तथा कार्यक्रमहरु लागू गर्नसक्ने खालका नरहेको बताउनुभएको हो ।
आर्थिक समस्याका कारण सरकारले ल्याएको नीति तथा कार्यक्रम पूर्णरुपमा लागू हुन्छ भन्नेकुरामा शंका रहेको उहाँको भनाइ छ ।
प्रमुख सचेतक घिमिरेले आर्थिक सुधार सुझाव आयोगले दिएको सुझावको आधारमा नीति तथा कार्यक्रमहरु समग्र रुपमा राम्रो आएपनि कार्यान्वयन गर्न चुनौतीपूर्ण रहेको बताउनु भयो ।
उहाँले भन्नभुयो, ‘नीति तथा कार्यक्रमले आर्थिक सुझाव आयोगले दिएका सुझावहरुलाई समेत राम्रोसँग समेटेको छ । समग्रमा यो नीति तथा कार्यक्रम राम्रो छ । तर सबैभन्दा ठूलो कुरा चुनौतीको पाटो छ । यसभन्दा अगाडि आउने नीति तथा कार्यक्रम पनि राम्रै हुन्थे । त्यसलाई लागू गर्नको लागि हामीसँग प्रयाप्त आर्थिक स्रोत पनि छैन । त्यस कारण नीति तथा कार्यक्रम कतिपय अवस्थामा सान्दर्भिक नभएका अथवा लागु गर्ने अवस्थामा नरहेका पनि हामीले देखेका हुन्छौं । त्यसकारण यो पनि लागू गर्ने कुरामा सन्देहभन्दा पनि चुनौतीपूर्ण छ ।
उहाँले नीति तथा कार्यक्रम कार्यान्वयनको चुनौतीलाई कसरी सामना गर्ने भन्नेकुरा सरकारको लागि गम्भिर प्रश्न रहेको बताउनु भयो ।
