पोखरा । पोखरा लेडी जेसीजले वैशाख १० गते शनिबारदेखि जेसीज सप्ताह आयोजना गरेको छ । सप्ताहव्यापी कार्यक्रम बनाएको लेडी जेसीजले सात दिन सात फरक प्रकारका कार्यक्रम गर्ने कार्यतालिका तय गरेको पोखरा लेडी जेसीजकी अध्यक्ष जेसी अनिता थापा खड्काले जानकारी दिए ।
पोखरा लेडी जेसीजका अनुसार जेसीज सप्ताहको पहिलो दिन कन्या क्याम्पसमा औपचारिक उद्घाटन कार्यक्रम हुनेछ भने त्यसलगत्तै सोहि विद्यालयमा अध्ययनरत विद्यार्थीका लागि ईपीएस तालिम सञ्चालन हुनेछ । सो कार्यक्रम ईशा आले (सिर्जना)को संयोजनमा हुने जनाइएको छ ।
सप्ताहको दोस्रो दिन पोखरा लेडी जेसीजले कौशी खेती तथा फोहोर व्यवस्थापन तालिम तथा मल वितरण कार्यक्रम गर्नेछ ।
पोखरा-१० को वडा कार्यालयमा आयोजना हुने सो कार्यक्रमको संयोजन सरिता भुजेलले गर्ने कार्यक्रम जेसिज सप्ताहकी मूल संयोजक नन्दकुमारी ढुंगाना (गीता)ले जानकारी दिईन् ।
सप्ताहको तेस्रो दिन विद्यार्थी लक्षित अन्नपूर्ण गाउँपालिका स्तरीय वक्तृत्व कला प्रतियोगिता हुनेछ । गाउँपालिकाको कार्यालयमा हुने सो कार्यक्रमको संयोजन रचना अधिकारीले संयोजन गर्ने उनले बताइन् ।
सप्ताहको चौथो दिन आधारभूत कानूनी सचेतना तालिम हुनेछ । पोखरा-३ नदीपुरको कार्यालयमा हुने एकल महिला लक्षित सो कार्यक्रमको संयोजन रेजिना कटुवालले गर्ने जनाइएको छ ।
सप्ताहको पाँचौं दिन पोखरा-२० को कार्यालय भलाममा ज्येष्ठ नागरिकसँग जेसीज युवा कार्यक्रम हुनेछ । ज्येष्ठ नागरिक लक्षित सो कार्यक्रमको संयोजन मलिना गुरुङले गर्ने संयोजक ढुंगानाले जानकारी दिइन् ।
यसैगरी सप्ताहको छैटौं दिन पोखरा-२२ पुम्दीभुम्दीमा निःशुल्क स्वास्थ्य शिविर आयोजना हुने भएको छ । ग्रामिण क्षेत्रका महिला लक्षित गरेर हुने सो कार्यक्रमको संयोजन विनिता केसीले गर्ने जनाइएको छ ।
सप्ताहको सातौं तथा अन्तिम दिन जेसी शुभद्रा बरालको संयोजनमा पोखरा-६ लेकसाईडस्थित केदारेश्वर महादेव मन्दिरमा बटुकलाई भोजन गराउनुका साथै खाद्यान्न वितरण गरिने संयोजक ढुंगानाले बताइन् ।
सोही दिन अपराह्न ४ः३० बजे रोजम्यारी किचन लेकसाईडमा एक औपचारिक कार्यक्रम गरेर सप्ताहको समापन गरिने उनले जानकारी दिइन् ।
जेसिज सप्ताह कार्यक्रम सामाजिक रुपान्तरणमा सघाउ पुर्याउने उद्देश्य राखेर तय गरिएको पोखरा लेडी जेसीजकी पूर्वअध्यक्ष विनिता सापकोटा (कमला)ले बताइन् ।
