पोखरा । गण्डकी प्रदेशमा शुक्रबारदेखि र देशभर सोमबारदेखि देशभर सार्वजनिक यातायात सञ्चालन ठप्प हुने भएको छ । राइड सेयरिङलाई मान्यता दिनेगरी गण्डकी प्रदेश सरकारले ल्याएको नियमावलीको विरोधमा सार्वजनिक यातायात व्यवसायीले यस्तो घोषणा गरेका हुन् ।
सार्वजनिक यातायात बचाउ संघर्ष समितिले तीन बुँदे माग अघि सारेर आन्दोलनमा उत्रिने चेतावनी दिएका हुन् । उनीहरुले आफ्ना सवारी साधन घर तथा ग्यारेजमै थन्क्याउने घोषणा गरे ।
उनीहरुका तीन बुँदे मागमा सरकारले ल्याएको नियमावली पूर्ण रूपमा खारेज हुनुपर्ने, सार्वजनिक सवारी संचालन विधि, आयात नीतिलगायत सम्बन्धमा प्रदेश सरकारको लिखित नीति ठोस हुनुपर्ने र सार्वजनिक यातायात क्षेत्रमा योगदानमा आधारित सामाजिक सुरक्षा कोष अनिवार्य लागू गर्नुपर्ने छ ।
नेपाल यातायात व्यवसायी राष्ट्रिय महासंघ गण्डकी संयोजक केदारप्रसाद पौडेलका अनुसार गण्डकी प्रदेशमा जेठ १६ र केन्द्रीय कार्यक्रमअनुसार जेठ १९ देखि देशभर यातायात सेवा ठप्प हुनेछ ।
गण्डकी प्रदेश सरकारले गत जेठ १ मा राइड सेयरिङ (नियमन र व्यवस्थापन) नियमावली २०८२ प्रदेश राजपत्रमा प्रकाशित गरेको थियो ।
त्यसलगत्तै यातायात व्यवसायीले नियमावली खारेज गर्न सरकारलाई ज्ञापन पत्र बुझाएको थियो । यस विषयमा सरकारले वार्ताका लागि आफूहरुलाई बोलाए पनि वार्तामा सहभागीहरु मन्त्रालयमा पुगेर चियामात्रै खाएर फर्किएको पृथ्वी राजमार्ग बस सञ्चालक कम्पनी लि.का अध्यक्ष योगेन्द्रबहादुर केसीले बताए ।
