पोखरा । यात्रुसँग चर्को भाडा अशुल्ने इनड्राइभ चालकलाई कास्की प्रहरीले कार्वाही गरेको छ । उनीहरुले सार्वजनिक यातायात बन्द भएको भन्दै यात्रुसँग तोकिएको भन्दा चार गुणा बढी भाडा लिएको पाइएको छ ।
यात्रुको गुनासोका आधारमा प्रहरीले पोखराका विभिन्न स्थानबाट आठ वटा सवारी साधनसहित नियन्त्रणमा लिएर उनीहरुलाई कार्वाही गरेको जिल्ला प्रहरी कार्यालय कास्कीका प्रवक्ता डीएसपी हरिबहादुर बस्नेतले जानकारी दिए ।
पक्राउ परेका चालकलाई यातायात व्यवस्था ऐन २०४९ अनुसार कारबाही गरी छाडिएको डीएसपी बस्नेतले जानकारी दिए ।
गण्डकी प्रदेश सरकारले राइड सेयरिङ तथा सेल्फ ड्राइभ सञ्चालन अनुमति दिने गरी नियमावली ल्याएसँगै यातायात व्यवसायी अन्दोलित छन् । गण्डकी प्रदेशमा चार दिनदेखि र आजदेखि देशभर अनिश्चितकालीन सार्वजनिक यातायात सञ्चालन बन्द गरिएको छ ।
यता, कुनै सवारीले तोकिएको भन्दा बढी भाडा लिएको पाइएमा सिधै १०० वा ट्राफिक १०३ मा खबर गर्न प्रहरीले आग्रह गरेको छ ।
