पोखरा । कास्की र तनहुँका तीन स्थानमा भएका तीन स्वास्थ्य शिविरमा सात सय जनाको सित्तैमा जाँच गरिएको छ ।
गण्डकी प्रदेशकै पाहिलो र एकमात्र आइएसओ प्रमाणपत्र प्राप्त रेफरेन्स ल्याब युनाइटेड रेफरेन्स ल्याबोरेटरी प्रालि(युआरएल)को प्राविधिक सहयोगमा ती शिविर भएका हुन् ।
बिहीबार पोखरा-२२ मा भएको शिविरमा मधुमेह र थाइराइडसम्बन्धी जाँच सित्तैमा गरिएको थियो । पोखरा लेडी जेसिजको आयोजनामा भएको कार्यक्रममको व्यवस्थापन सन्तान आइभिएफ महेन्द्रपुलले गरेको थियो ।
कार्यक्रममा पोखरा-२२ का वडाध्यक्ष हिमलाल बरालले स्थानीयको टोल, टोलमै विशेषज्ञसहितको गुणस्तरीय सेवा र सचेतना उपलब्ध हुँदा स्वास्थ्य सेवाको उपलब्धतामा सहज हुने बताए ।
तीन सय जनाको सित्तैमा जाँच गरिएको कार्यक्रममा रेडियोलोजी सेवासहित पोखरा स्वास्थ्य विज्ञान प्रतिष्ठानका चिकित्सकले पनि सेवा दिएका थिए ।
कार्यक्रममा सन्तान आइभिएफका प्रबन्ध निर्देशक नीलकण्ठ पराजुलीले पछिल्लो समय बढेको बाँझोपनको निदान र सन्तान प्राप्तिका अरु उपाय पनि रहेको औंल्याए ।
उनले यो प्रविधि केही महंगो रहेको जनाउँदै उनले विपन्न नागरिकलाई वडा कार्यालयको सिफारिसमा शतप्रतिशतसम्म शुल्कमा छुट दिइने प्रष्ट पारे । पोखरा लेडी जेसिसकी अध्यक्ष गीता ढुंगानाले समेत बोलेकी थिइन् ।
शुक्रबार ज्योति कुञ्ज सेकेन्डरी स्कुल पोखरा-१० रामबजारको आयोजनामा नि:शुल्क शिविर आयोजना गरियो । विद्यालयको ३६औं वार्षिकोत्सवको अवसरमा भएको कार्यक्रममा एक सय ७० जनाको मधुमेह र रगतमा हुने खराब बोसो (टिजी) सित्तैमा जाँच गरिएको थियो ।
विद्यालयका संस्थापक अध्यक्ष बालाकृष्ण शर्माको अध्यक्षतामा भएको कार्यक्रममा युआरएलका अध्यक्ष ठाकुरप्रसाद पन्थले युआरएलले सेवासँगसँगै सामाजिक उत्तरदायित्व बहन गर्दै आएको जनाए ।
उनले भने, ‘सेवासँगै सामाजिक उत्तरदायित्व बहनमा पनि हामीअघि छौँ, नागरिक, स्वास्थ्यकर्मी र समाजको विश्वास र साथ पनि पाएका छौँ ।’
शनिबार तनहुँको सेवा हस्पिटल दुलेगौंडाको आयोजनामा अर्काे शिविर भएको छ । यो शिविरमा तीन सय ११ जनाको मधुमेह र थाइराइडसम्बन्धी जाँच सित्तैमा गरिएको थियो ।
कार्यक्रममा पोखरा स्वास्थ्य विज्ञान प्रतिष्ठानका वरिष्ठ फिजिसियन डा कृष्णराज अधिकारीले खानपान र जीवनशैलीकै कारण धेरै रोग लाग्ने भएकाले त्यसमा ध्यान पुर्याउन आग्रह गरे ।
उनले भने, ‘समाजमा अनेक भ्रम पनि छन्, ती भ्रमको पछि नलागी बेलाबेलामा स्वास्थ्य जाँच, उचित उपचार र खानपान अवलम्बन गरे दीर्घजीवन सम्भव हुन्छ ।’
कार्यक्रमा युआरएलका प्रबन्ध निर्देशक गणेशप्रसाद कोइरालाले सर्वाेत्कृष्ट प्रविधिसँगै दक्ष जनशक्ति र गुणस्तरीय सेवाका कारण युआरएल यो क्षेत्रको अग्रणी ल्याब बनेको बताए ।
तनहुँको सेवा हस्पिटलका अध्यक्ष हरि खड्काको अध्यक्षतामा भएको कार्यक्रममा युआरएलका मार्केटिङ निर्देशक मणि न्यौपानेलगायतले बोलेका थिए ।
युआरएलले विभिन्न संघसंस्थासँगको सहकार्यमा अहिलेसम्म एक सय ९९ शिविर आयोजना गरिसकेको छ ।
