पोखरा । यसवर्षको ‘अन्नपूर्ण पर्यटन पत्रकारिता पुरस्कार-२०८२’ बाट पत्रकार रोहितराज पराजुली पुरस्कृत भएका छन् । कास्कीको पर्यटकीय गाउँ घान्द्रुकमा भएको अन्नपूर्ण म्याराथनको समापन समारोहमा पत्रकार पराजुलीलाई नगदसहित पुरस्कृत गरिएको हो ।
गण्डकी प्रदेशसभा सदस्य प्रकाश बराल, नेपाल पर्यटन बोर्डका सदस्य ऋषिराम भण्डारी, प्रतिभा छनोट समिति संयोजक एवं नेपाल पत्रकार महासंघ कास्कीका पूर्व उपाध्यक्ष राजबहादुर गुरुङ, अन्नपूर्ण सेन्चुरी पर्यटन समिति अध्यक्ष ललित गुरुङलगायतले पत्रकार पराजुलीलाई पुरस्कृत गरेका हुन् ।
पुरस्कारको राशि २५ हजार रुपैयाँ नगद र सम्मानपत्र छ । पराजुली नयाँपत्रिका दैनिकको पोखरा व्यूरोमा कार्यरत छन् ।
कास्कीको अन्नपूर्ण गाउँपालिका, घान्द्रुकस्थित अन्नपूर्ण सेन्चुरी पर्यटन समितिद्वारा स्थापित एवं सञ्चालित सो पुरस्कार अन्नपूर्ण गाउँपालिकाको पर्यटन प्रवर्द्धन गर्ने एक जना पत्रकारलाई ३ जुन अर्थात अन्नपूर्ण हिमाल आरोहण दिवस दिन प्रदान गरिन्छ ।
सो पुरस्कारबाट यसअघि पत्रकारद्वय बासुदेव पौडेल र दीपक परियार, दोस्रोपटक रुपनारायण ढकाल र सन्तोष पोखरेल र तेस्रोपटक रविचन्द्र पराजुली सम्मानित भइसकेको छन् ।
पोखरा १, लामपाटन मार्ग घर भएका पराजुली आमा दमयन्ती पराजुली र बुबा माधबप्रसाद पराजुलीका जेठा छोरा हुन् ।
२०६१ सालदेखि पोखरामा रहेर पत्रकारिता गर्दै आएका पराजुलीले सुरुमा आदर्श समाज राष्ट्रिय दैनिकमा विद्यार्थी पत्रकारको रुपमा पत्रकारीताको यात्रा सुरु गरेका थिए ।
त्यसपछि जनमत दैनिक, रेडियो वाराही हुँदै २०६६ देखि नयाँ पत्रिका राष्ट्रिय दैनिकमा आवद्ध रहदै पत्रकारीता क्षेत्रमा क्रियाशील छन् ।
पराजुलीले यस अघि नेपाल सरकार युवा तथा खेलकुद मन्त्रालयले प्रदान गर्ने खेलकुद पत्रकारिता प्रोत्साहन पुरस्कार २०८०, नेपाल खेलकुद पत्रकार मञ्च गण्डकीद्वारा उत्कृष्ट खेलकुद पत्रकारिता अवार्ड २०८० बाट पुरस्कृत एंव सम्मानत भइसकेका छन् ।
