पोखरा । लायन्स क्लब पोखरा अन्नपूर्णद्वारा विभिन्न आठ वटा क्लबलाई लायन बर्ष ०२५/०२६ मा विभिन्न विद्यालयमा खानेपानी टंकी निर्माणका लागि सहमतिपत्र हस्तान्तरण भएको छ ।
लायन्स क्लब पोखरा अन्नपूर्णका अध्यक्ष गणेश छबिले लायन्स क्लब पोखरा हेमजा, लायन्स क्लब पोखरा समृद्धि, लायन्स क्लब फिष्टेल सिटी, लायन्स क्लब पोखरा गण्डकी, लायन्स क्लब पोखरा अन्नपूर्ण नाइस, लायन्स क्लब पोखरा गण्डकी यूथ, लायन्स क्लब पोखरा अन्नपूर्ण र लियो क्लब पोखरा अन्नपूर्णका अध्यक्षहरुलाई सहमति पत्र प्रदान गरे ।
सो अवसरमा परियोजना निर्देशक सोनाम साङपोले सन २०१७ देखि संचालन थालनी भएको बताए । उनले पोखरा आसपासका ४८ वटा विद्यालयमा यो परियोजना सम्पन्न भइसकेको जानकारी दिए ।
अहिलेको परियोजनाले अन्नपूर्ण गाउँपालिकादेखि मादी गाउँपालिकाका विद्यालयलाई समेटेको बताए । प्रत्येक विद्यालयलाई रु दुई लाखको दरले प्रदान गरिनेछ ।
बेलायतमा अध्ययनरत विद्यार्थीले खाजाको रकम कटाएर उक्त रकम दिएको साङपोले बताए ।
सो अवसरमा लायन्स क्लब पोखरा हेमजाका अध्यक्ष दुर्गाप्रसाद पौडेल, लायन्स क्लब पोखरा समृद्धिका अध्यक्ष सन्ध्या लिगल बानिया, चण्डीका आधारभूत विद्यालयका प्रधानअध्यापक देवीकुमारी गुरुङलगायतले बोलेका थिए ।
उक्त परियोजनाको पहिलो खानेपानी टंकी अन्नपूर्ण गाउँपालिका वडा नं २ स्थित माछापुच्छे मावि नाउँडाडामा जुलाई २ मा शिलान्यास गरिने अध्यक्ष गणेश छबिले जानकारी दिए ।
