पोखरा । पोखरा महानगरपालिका क्षेत्रमा मेगा वृक्षरोपण अभियानको शुभारम्भ गरिएको छ । विश्व वातावरण दिवसकाे अवसर पारेर उक्त अभियान शुभारम्भ गरिएकाे हाे ।
पोखरालाई स्वच्छ शहरः हरित सहरको रूपमा विकास गर्न क्लिन सिटी, ग्रीन सिटी परियोजनाअन्तर्गत वृक्षरोपण अभियानको नगर प्रमुख धनराज आचार्यले शुभारम्भ गरेका हुन् ।
पोखरा महानगरपालिका वडा नं.२५ हेमजामा कल्की, धूपीलगायत बिरुवा लगाएर सुरुवात गरिएको अभियानमा नगर प्रमुख आचार्य, उपप्रमुख मन्जुदेवि गुरुङ, प्रमुख प्रशासकीय अधिकृत शिवराज चौलागाई, प्रवक्ता मोतीलाल तिम्सिना, दलका नेताहरू राधिका शाही योगी, पूर्ण कुमार गुरुङ र नागरिक समाजका अगुवा राम बहादुर पौडेल सहभागी थिए ।
अभियानका क्रममा पोखरा महानगरपालिका क्षेत्रको सात सय किमी सडक तथा राजमार्ग, झन्डै ६७ किमि नदी तथा खोला किनार, २९ सार्वजनिक स्थलको १२५ हेक्टर खुला क्षेत्रमा ३८ प्रजातिका दुइ लाख २६ हजार बिरुवा लगाइनेछ ।
