पोखरा । पोखरा महानगरपालिका वडा नं १२ स्थित पोखरा युनाइटेड एकेडेमीमा ‘बुक फ्री डे इभेन्ट’ शुक्रबार सम्पन्न भएको छ ।
इभेन्टमा कक्षा ६ देखि १० सम्मका विद्यार्थी सहभागी थिए । प्रत्येक महिनाको अन्तिम शुक्रबार ‘बुक फ्री डे इभेन्ट’ हुने विद्यालयले जनाएको छ ।
इभेन्टअन्तर्गत छात्रतर्फ फुटसल, आउटिङ, हाउस वायरिङ, ग्राफिक्स डिजाइन सम्पन्न भएको विद्यालयका सहायक प्राचार्य देवेन्द्र अधिकारीले जानकारी दिए । उनका अनुसार छात्रातर्फ दुना टपरी गास्ने, आउटिङ, कुकिङ, नृत्य, टेवलटेनिस सम्पन्न भएको छ ।
आउटिङ कार्यक्रमतर्फ लागूऔषध दुर्व्यसनी न्यूनीकरणका लागि सचेतना कार्यक्रम गरिएको विद्यालयका सहायक प्राचार्य गोविन्द चापागाइँले जानकारी दिए ।
सहायक प्राचार्य चापागाईंका अनुसार विभिन्न कार्यक्रमका लागि विद्यालयका शिक्षक-शिक्षिकाहरुले सहजीकरण गरेका थिए ।
विद्यालय व्यवस्थापन समिति अध्यक्ष शिवबहादुर भण्डारीले अध्यक्ष भण्डारीले सिक्ने र सिकाउने थलोका रुपमा विद्यालय भएकालेसोही प्रकारको वातावरण सिर्जना गरिएको बताए ।
प्राचार्य बयानबहादुर गोदारले विद्यार्थीलाई अध्ययनसँगै स्वरोजगार र आत्मनिर्भर बनाउने लक्ष्य विद्यालयको रहेको बताए ।
२०५० सालमा स्थापित विद्यालयमा हाल आठ सय ५० विद्यार्थी रहेकामा कक्षा ११ र १२ मा मात्रै दुई सय २० विद्यार्थी छन् । विद्यालयका कक्षा ११ र १२ मा विज्ञान, व्यवस्थापन र होटल व्यवस्थापनको पढाई हुँदै आइरहेको छ ।
विद्यालयका अनुसार आगामी दिनमा मोवाइल, टीभी र अन्तर्राष्ट्रिय भाषासँग सम्बन्धित कक्षा सञ्चालनको तयारी गरिएको छ ।
