पोखरा । पोखरा महानगरपालिका स्वास्थ्य महाशाखाले पोखरा-१७ विरौटास्थित राममन्दिर प्राङ्गणमा ज्येष्ठ नागरिकको नसर्ने रोगको निःशुल्क स्क्रिनिङ तथा परामर्श सेवा शुरु गरेको छ ।
घरघरमा स्वास्थ्य कार्यक्रमअन्तर्गत उक्त सेवा सोमबारदेखि शुरु गरिएको हो । कार्यक्रममा नसर्ने रोगको स्क्रिनिङअन्तर्गत ज्येष्ठ तथा अशक्त नागरिकको स्वास्थ्य परीक्षण, महिलाको प्रजनन स्वास्थ्यसम्बन्धी सचेतनामूलक कार्यक्रम तथा स्वास्थ्य जाँच शिविर, मनोरोग, सरूवा एवं अन्य दीर्घरोगसम्बन्धी जानकारी एकैसाथ सुरु गरिएको छ ।
कार्यक्रम उद्घाटन गर्दै पोखरा महानगरपालिकाकी उपप्रमुख मञ्जुदेवी गुरुङले महानगरवासीको स्वास्थ्यप्रति महानगर गम्भीर रहेको बताइन् । उनले रोग लागेपछि उपचार भन्दापनि सुरूमै रोग लाग्न नदिन सचेत हुनुपर्ने बताइन् ।
उपप्रमुख गुरुङले आगामी आर्थिक वर्षको साउनपछि महानगरको ३३ वटै वडामा यो कार्यक्रम लैजाने तयारी गरेको जानकारी दिइन् ।
उनले स्वास्थ्य बीमा कार्यक्रम लागू गर्ने सन्दर्भमा विभिन्न समस्या देखिएको भन्दै त्यसलाई समाधान गर्नका लागि संघ सरकारसँग पहल भईरहेको उल्लेख गरिन् ।
पोखरा-१७ की वडाध्यक्ष राधिका शाही योगीले वडावासीले शिविरको लाभ लिने अपेक्षा गर्दै कार्यक्रम महत्वपूर्ण रहेकाले स्वास्थ्य सेवाको महाअभियानमा जोडन सबैमा आग्रह गरिन् ।
कार्यक्रम अवधिभर ज्येष्ठ नागरिक तथा असहायहरुको स्वास्थ्य जाँच, औषधि सेवनबारे परामर्श, विभिन्न उमेर समूहका व्यक्तिलाई मनोसामाजिक परामर्श, महिलालाई पाठेघरको मुखको क्यान्सरलगायत विभिन्न जाँच, नसर्ने रोगहरुसम्बन्धी सचेतना फैलाउने कार्य गरिने बताइन्छ।
