पोखरा । पोखरा महानगरपालिका वडा नं ७ को वडा कार्यालयले वडाभित्रका पाँच वटा कृषि फर्मलाई पानी ट्यांकी हस्तान्तरण गरेको छ । तरकारी खेती र पशुपालनमा महत्वपूर्ण टेवा पुर्याउने उद्देश्यले पानी ट्यांकी हस्तान्तरण गरिएको हो ।
बराल नर्सरी, गिरी कृषि फर्म, पञ्चामृत कृषि फर्म, तारा चालिसे कृषि तथा पशु फर्म र पुष्पाञ्जली फ्लावर नर्सरीलाई तत्कालको आवश्यकताका आधारमा ट्यांकी प्रदान गरिएको वडासचिव राजेन्द्र पौडेलले जानकारी दिए । कृषकले एक हजार लिटरको ट्यांकी पाएका हुन् ।
कार्यक्रममा वडाध्यक्ष राममोहन आचार्यले कृषकको मनोवल उच्च बनाउने उद्देश्यका साथमा ट्यांकी प्रदान गरिएको बताए । यसले कृषकको आर्यआर्जनमा ठूलो टेवा पुर्याउने उनले विश्वास व्यक्त गरे । वडा कार्यालय वडावासीकाे साथमै रहेको वडाध्यक्ष आचार्यको भनाइ छ ।
कृषि सञ्जाल पोखरा-७ का अध्यक्ष पंकज पौडेलले वडाको सहयोगले कृषकलाई निकै ठूलो महत्व राख्ने र वडाको कार्य निकै स्तुत्य रहेको बताए ।
वडाको यो सहयोगले उत्पादन वृद्धि गर्न केही न केही टेवा पुर्याउने उनको विश्वास छ । पोखरा-७ आवासीय क्षेत्र भनिए पनि उत्पादनमा पनि कुनै कमि नभएको अध्यक्ष पौडेलले बताए ।
अध्यक्ष पौडेलको अध्यक्षतामा भएको कार्यक्रममा उपाध्यक्ष कमला बरालले स्वागत र वडासचिव राजेन्द्र पौडेलले सञ्चालन गरेका थिए ।
