पोखरा । पोखरास्थित फेवातालको बाँधमुनि पौडी खेल्ने क्रममा बेपत्ता भएका धादिङका एक युवक अझै भेटिएका छैनन् ।
धादिङको धुनीबेसी नगरपालिका वडा नं १ ओडारेका २७ वर्षीय सुरेश तामाङ सोमबार साँझदेखि बेपत्ता भएका थिए ।
उनको खोजीमा नेपाल प्रहरी, सशस्त्र प्रहरी, आफन्तजन आज बिहानैदेखि जुटे पनि साँझसम्म फेला नपरेका हुन् । उनको खोजीमा सशस्त्र प्रहरीको गोताखोरसमेत परिचालन गरिएको छ ।
धादिङ-पोखरा सम्पर्क समाजका महासचिव प्रकाश दुलालका अनुसार सुरेश पाँच दिन अघि मात्रै पोखरा आएका थिए ।
सोमबार साँझ करिब ७ः३० बजे अन्य तीन जना साथीसँग पौडी खेल्ने क्रममा उनलाई पार्दी खोलाले बगाएको थियो । प्रत्यक्षदर्शीका अनुसार उनीसँगै तामाङसँगै खोलामा पौडिएका अन्य तीन जना भने मुस्किलले बाँच्न सफल भएका थिए । तामाङलाई बचाउने कोसिस गर्दा नसकिएको उनीसँगै पौडी खेल्न गएका साथीहरु बताउँछन् ।
यसैबीच तामाङको खोजीमा कुनै कमि नगरिदिन धादिङ-पोखरा सम्पर्क समाजले प्रहरी लगायत सम्बन्धित निकायमा आग्रह गरेको छ ।
समाजका महासचिव दुलालले आज वडा प्रहरी कार्यालय बैदामका प्रमुख प्रहरी नायव उपरीक्षक (डीएसपी) सन्तोष निरौलालाई भेटेर तामाङको खोजीमा कुनै कमि नगरिदिन आग्रह गरेका हुन् ।
डीएसपी निरौलाले तामाङ हराएसँगै प्रहरी खोजीमा जुटेको भन्दै कुनै कमि नहुने प्रतिवद्धता जनाएका छन् ।
उनले तामाङको खोजीमा गोताखेर समेत परिचालन गरिएको, ड्याम बन्द गरेर खोज्दा नभेटिएपछि पुनः ड्याम खोलेर खोजी गरिएको तर नभेटिएको बताए ।
प्रहरीले पोखराको डेभिडफल्स र फुस्रेखोलामा समेत उनको खोजी गरिरहेको जनाएको छ । तामाङको खोजीमा प्रहरी निरीक्षक सुमित कुशबाहको नेतृत्वमा टोली परिचालित भएको छ ।
