पोखरा । सामाजिक अध्ययन मञ्च कास्कीले आयोजना गरेको क्षेत्र भ्रमण तथा अवलोकनमा आधारित प्रतिवेदन लेखन प्रतियोगितामा रेन्बो एकेडेमिक होम्सकी स्वीकृति भण्डारी प्रथम स्थान हासिल गरेकी छन् ।
आफूसँगै प्रतिस्पर्धा गरेका अन्य ९५ जना विद्यार्थीलाई पछि पार्दै स्वीकृतीले प्रथम स्थान हासिल गरेकी हुन् । योसँगै उनले छ हजार रुपैयाँ नगद पुरस्कार प्राप्त गर्ने भएकी छन् । भण्डारी रेन्बो एकेडेमीको कक्षा ९ मा अध्ययनरत छन् ।
रेन्बोका प्राचार्य बाबुराम बरालले प्रतिवेदन लेखनमा भण्डारीले प्रथम स्थान हासिल गरेर विद्यालयको गरिमा उचो बनाएको भन्दै बधाई तथा उज्ज्वल भविष्यको काम गरे ।
प्रतियोगितामा शान्ति निकेतन माविकी सुजिता क्षेत्री दोस्रो र बाल प्रभात माविकी उत्सवी सुवेदी तेस्रो तथा सैनिक आवाशीय माविकी अदिती ढकाल, ओखलेडाँडा माविकी अनुषा नेपाली र कास्की मोर्डनाइज्ड एकेडेमीकी श्रीषा रानाभाटले सान्त्वना स्थान हासिल गरे ।
कार्यक्रम संयोजक नारायणी शर्मा गौतमका अनुसार मञ्चले विद्यार्थीलाई अध्ययन र अनुसन्धानमा प्रेरित गर्नका लागि उच्च अदालत पोखरा क्षेत्र भ्रमण गराइएको थियो । जहाँ विद्यार्थीले प्रत्यक्ष रूपमा अदालती प्रक्रिया, न्यायालयको संरचना, न्याय प्रणालीका विविध पक्षबारे अध्ययन अवलोकन गरी जानकारी लिएका थिए ।
विद्यार्थीले त्यसैका आधारमा प्रतिवेदन लेखेका थिए ।
मञ्च अध्यक्ष गोविन्द काफ्लेको अध्यक्षतामा भएको कार्यक्रममा जनप्रिय बहुमुखी क्याम्पसमा क्याम्पस प्रमुख कृष्णबाबु बराल, मञ्चका सचिव तिलक काफ्ले, कार्यक्रम संयोजक नारायणी शर्मा, निवर्तमान अध्यक्ष दिनेश अर्याल, उच्च अदालत पोखराका उपरजिस्ट्रार जीवन पौडेललगायतले सहजीकरण गरेका थिए ।
