पोखरा । बजेटमा म्याग्दीलाई दुई-दुई वर्ष अन्याय गरिएको भन्दै गण्डकी प्रदेशसभा सदस्य रेशमबहादुर जुग्जालीले रोष्ट्रम मै बजेट पुस्तिका च्यातेका छन् ।
नेकपा माओवादी केन्द्रका सांसद जुग्जाली पूर्व भौतिक पूर्वाधार विकास मन्त्रीसमेत हुन् ।
उनले विशेषगरि भौतिक पूर्वाधार विकास मन्त्रालयको वार्षिक विकास कार्यक्रमबारे असन्तुष्टि जनाउँदै सोमबार बजेट पुस्तिका च्यातेका हुन् ।
उनले संसदमा बोल्ने समय २० मिनेट पाए पनि बजेटमा असन्तुष्टि जनाउँदै करिब १० मिनेटमात्रै बोले ।
उनले म्याग्दीका लागि अहिले छुट्याइएको साढे तीन करोड बजेट पनि फिर्ता लैजान अर्थ र भौतिक मन्त्रीलाई चुनौती दिए ।
उनले भने, ‘बजेटमा म्याग्दीलाई दुईदुई वर्षसम्म अन्याय गरिएको र यसको कुनै अर्थ नहुने भएकाले म सबै पीडित सांसदको प्रतिनिधित्व गर्दै यो पुस्तक च्यात्न चाहन्छु ।’
म्याग्दीको भौगोलिक अवस्था नबुझेको हो भने आफ्नै खर्चमा अर्थ र भौतिकमन्त्रीलाई म्याग्दीको गुर्जादेखि नारच्याङ हुँदै दारखोलासम्म घुमाउने भन्दै उनले व्यंग्य गरे ।
