पोखरा । सुनचाँदी व्यवसायीले साउन १ देखि देशभरका सुनचाँदी व्यवसाय अनिश्चितकालीन बन्द गर्ने चेतावनी दिएका छन् ।
सरकारले ल्याएको आगामी आर्थिक वर्ष ०८२/८३ को बजेटमा समेटिएका अव्यवहारिक कर नीतिविरूद्ध व्यवसायीहरुले चरणवद्ध आन्दोलनको घोषणा गर्दै व्यवसाय अनिश्चितकालीन बन्द गर्ने चेतावनी दिएका हुन् ।
नेपाल सुनचाँदी रत्न तथा आभूषण महासंघ र नेपाल सुनचाँदी व्यवसायी महासंघद्वारा संयुक्त रुपमा विज्ञप्ति जारी गरी आन्दोलनको घोषणा गरिएको हो ।
सरकारले सुनचाँदी, हिरा, जवाहतरात तथा हस्तकला व्यवसायीलाई मात्र नभई आम उपभोक्तालाई समेत प्रत्यक्षरुपमा असर पर्ने गरी दुई प्रतिशत विलासिता कर र १३ प्रतिशत भ्याटको नाममा चर्को भार पार्न खोजिएको नेपाल सुनचाँदी रत्न तथा आभूषण संघ कास्कीका सचिव सुरेन्द्र विकले आरोप लगाए ।
सरकारले सुनमा लगाइएको विलासिता कर र हिरामा लगाइएको भ्याट खारेज नगरेसम्म आन्दोलन नरोकिने उनले चेतावनी दिए । सरकारको यो नीतिले आफूहरुको व्यवसाय नै बन्द गर्नुपर्ने अवस्था सिर्जना भएको विकले बताए ।
व्यवसायीले केही दिन अघि पनि व्यवसाय बन्द गरेर प्रमुख जिल्ला अधिकारीमार्फत ज्ञापनपत्र बुझाएका थिए भने र्याली र कोणसभा गरेका थिए ।
