पोखरा । पोखराको लेकसाइडस्थित बड्स एकेडेमीबाट २ जना विद्यार्थीले एसइई–२०८१ मा सर्वोत्कृष्ट ४.० जिपिए ल्याउन सफल भएका छन् । विद्यालयलबाट पहिलोपल्ट ४.० जिपिए आएपछि विद्यालय परिवारमा खुसीयाली छाएको छ ।
यहाँबाट लेकसाइडकी सुष्मा खत्री र मालेपाटनकी नीतु भण्डारीले ४.० जिपिए ल्याएका हुन् । त्यस्तै, पूर्णिमा वाग्लेले ३.७९ जिपिए ल्याएकी छन् भने अन्य विद्यार्थीले पनि उत्कृष्ट जिपिए ल्याउन सफल भएको प्रिन्सिपल प्रकाशराज वाग्लेले जानकारी दिए ।
४ जिपिए ल्याएकासहित उत्तीर्ण सबै विद्यार्थीलाई विद्यालयले एक समारोह आयोजना गरी हार्दिक बधाई तथा सम्मान कार्यक्रम गरेको छ ।
पोखरा ६, बैदामस्थित बड्सले यसअघि पनि उत्कृष्ट नतिजा हासिल गर्दै आएको उनले बताए । २०७१ सालमा बड्सका सुभाष तिमिल्सिनाले ९३.७१ जिपिए ल्याएका थिए । सोही वर्ष एनप्याब्सन कास्कीमा विद्यालय प्रथम भएको थियो ।
त्यतिमात्र कहाँ हो र, २०८० सालमा पनि बड्सकै विमला पौडेलले एसइई नतिजामा ३.९६ जिपिए ल्याएकी थिइन् । सोही वर्ष पनि विद्यालय एनप्याब्सन कास्की प्रथम भई पुरस्कृत भएको थियो ।
प्रिन्सिपल वाग्लेले विद्यार्थी, शिक्षक र अभिभावकको अथक प्रयासले उत्कृष्ट नतिजा आउन सफल भएको भन्दै सम्पूर्णप्रति आभार व्यक्त गरे । उनले आगामी दिनमा पनि विद्यालयले आफ्नो बिरासत कायम गर्दै अघि बढ्ने उनको प्रतिबद्धता छ ।
२०६२ सालमा स्थापना भएको विद्यालयमा हाल ४१८ विद्यार्थी छन् ।
