पोखरा महानगरपालिका वडा नम्बर ६ का वडा सदस्य दीपेन्द्र पहारीले जनप्रतिनिधीका रुपमा आफुले पाएको तलब भत्ता रकम विभिन्न सामाजिक सेवामा खर्चिने गरेका छन् । हालै उनको व्यवस्थापन तथा खहरे आमा समूहको आयोजनामा श्री प्रभात आधारभूत विद्यालय पोखरा – १८ सेदीमा ६० थान रेनकोट तथा १ दिवसीय खाजा वितरण कार्यक्रम सम्पन्न भएको छ । सो अवसरमा विद्यालयमा लामो समयदेखि अध्यापन गराइरहेका शिक्षक कृष्ण प्रसाद कोइरालालाई दोसल्ला र सम्मानपत्र सहित सम्मान गरेका थिए । खहरे आमा समूहका अध्यक्ष अन्जना पहारीको अध्यक्षतामा उक्त कार्यक्रम सम्पन्न नीति प्रेसमा प्रकाशित समाचारमा उल्लेख गरिएको छ ।
समाज सेवामा लाग्दा खुसि तथा सन्तुष्टि प्राप्त हुने वडासदस्य पहारी बताउँछन् । ‘उनी कहिले लौरो बाँडन जेष्ठ बुवा आमाकहाँ पुग्छन् त कहिले आफुले पाउने भत्ता रकम शिक्षा, स्वास्थ्य लगायतका सामाजिक सेवामा खर्चिने गरेका छन्’– नीति प्रेसले आफ्नों समाचारमा उल्लेख गरेको छ ।
हाल सम्म उनले विभिन्न क्षेत्रमा ८ सय लौरो वितरण गरिसकेका छन् । बृद्ध बुवा आमाको सहरा र सम्मानका लागि लौरो वितरण गरिएको सदस्य पहारी बताउँछन् । ‘मानव सेवानै ठूलो धर्म हो, सामाजिक सेवा गर्न पाउँदा मलाई निकै आनन्द प्राप्त हुन्छ’ –उनी भन्छन् ।
उनले वडाका विभिन्न स्थानमा जेष्ठ नागरिक तथा समाजसेवीलाई सम्मान गरेका छन् । पहारीले फेवाताललाई आधार बनाएर बर्षौदेखि ताल वरपर बस्दै आएका जलारी समुदायलाई स्पिकर हस्तान्तरण गरेका छन् । वडा सदस्यका रुपमा वडावासीको सेवा गर्नु त अनिवार्य पाटो भयो, त्यस अलावा व्यक्तिगत रुपमा आफ्नैं खर्चमा समेत सहयोग गर्न उनी पछि पर्दैनन् । जनप्रतिनिधी बन्नु अघि उनी पर्यटन व्यवसायमा आवद्ध थिए । युवा पर्यटन व्यवसायी पहारी वडा सदस्यमा निर्वाचित भएपछि वडावासीले उनीसंग लिएको अपेक्षा पुरा गर्न आफु लागिरहेको उनको भनाई छ ।
