प्रधानमन्त्री सुशीला कार्कीले संविधान दिवसको अवसरमा आयोजित विशेष कार्यक्रममा सरकार जनअपेक्षा अनुसार काम गर्न पूर्ण रूपमा प्रतिबद्ध रहेको स्पष्ट गरेकी छन्।
शुक्रबार आयोजित कार्यक्रममा उनले कानूनी समानता, सुशासन, भ्रष्टाचारको अन्त्य, पारदर्शिता र विकासजस्ता विषयहरूलाई राष्ट्रिय एजेण्डाका रूपमा अघि बढाउने बताइन्। उनका अनुसार जनताको गुणस्तरीय जीवनस्तर र सरकारका कामकारबाहीमा पारदर्शिता सुनिश्चित गर्नु वर्तमान सरकारको प्राथमिकता हो।
प्रधानमन्त्री कार्कीले शासकीय आकांक्षा वा पदको लोभका कारण प्रधानमन्त्री नभएको प्रष्ट पार्दै, संविधानले तोकेअनुसार छ महिनाभित्र प्रतिनिधिसभाको निर्वाचन सम्पन्न गरी जनप्रतिनिधि सरकारलाई जिम्मेवारी हस्तान्तरण गर्ने प्रतिबद्धता दोहोर्याइन्।
उनले विशेष गरी युवा पुस्ताले उठाएका रोजगारीका अवसर, कानूनी समानता, सुशासन र भ्रष्टाचारविरुद्धको लडाइँलाई साझा राष्ट्रिय एजेण्डाका रूपमा सम्बोधन गर्ने प्रतिवद्धता व्यक्त गरिन्। साथै, संविधानको मर्म र भावना अनुसार स्वतन्त्र र सक्षम न्यायपालिका तथा लोकतान्त्रिक मूल्य–मान्यतामा खरो उत्रन नसक्नुकै परिणाम आजको चुनौती भएको पनि उनले उल्लेख गरिन्।
प्रधानमन्त्री कार्कीले नागरिकका आवश्यकता र आकांक्षा समयसँगै परिवर्तन हुने भएकाले राज्य निरन्तर सुधारको बाटोमा अघि बढ्नुपर्ने निष्कर्ष समेत प्रस्तुत गरिन्।
